धनुषामा ट्राफिक सप्ताह शुभारम्भ, दुर्घटना न्यूनिकरणमा जोड दिन आग्रह

न्यूज ब्यूरो, जनकपुरधाम । धनुषामा ट्राफिक सचेतना अभियान सुरु भएको छ । एक समारोहबीच शुक्रबार जनकपुरमा ट्राफिक सचेतना अभियानको शुभारम्भ गरिएको छ । 

मधेश प्रदेश सरकारको गृह, सञ्चार तथा कानून मन्त्रालयको आयोजनामा तथा जिल्ला ट्राफिक प्रहरी कार्यालय धनुषाको सहकार्यमा ट्राफिक सचेतनामूलक साताव्यापी कार्यक्रम सुरु गरिएको हो । मधेश प्रदेशका गृहमन्त्री राजकुमार लेखीले जनकपुरधाममा प्रभातफेरी निकालेर अभियानको श्रीगणेश गरे । 

उद्घाटन समारोहको प्रमुख अतिथि मुख्यमन्त्री सतिस कुमार सिंहले मधेशमा ट्राफिक नियम उल्लंघन अन्य प्रदेशको तुलनामा बढी भएको बताउँदै सबैले नियमको पालना गरे मात्र दुर्घटनाबाट बच्न सकिने बताए। उनले गाडी चालकको मनोविज्ञान र सतर्कता आवश्यक भएको उल्लेख गर्दै नागरिकले आजैबाट नियम पालना सुरु गर्नुपर्ने धारणा राखे।

गृहमन्त्री लेखीले ट्राफिक नियमको अवहेलन, लापरवाहीपूर्ण सवारी र लागू पदार्थ दुर्व्यसनका कारण युवाहरू ठूलो संख्यामा दुर्घटनामा परिरहेको प्रति चिन्ता व्यक्त गरे। उनले भने, “हरेक युवासँग दुई पाङ्ग्रे सवारीसाधन छ, तर त्यसको प्रयोगमा सावधानीको घोर अभाव छ। यही लापरवाहीका कारण हरेक वर्ष सयौं युवा ज्यान गुमाइरहेका छन्।”

उद्घाटन कार्यक्रममा प्रदेश सचिव बिमल प्रसाद बराल, नेपाली सेना, सशस्त्र प्रहरी, प्रदेश प्रहरी तथा अनुसन्धान निकायका उच्च अधिकारीहरूको उपस्थिति थियो। ट्राफिक सप्ताह भरि विभिन्न जनचेतनामूलक गतिविधिहरू सञ्चालन गरिने छ।

कार्यक्रममा जिल्ला ट्राफिक प्रहरी कार्यालय धनुषाका प्रमुख सूर्य बहादुर शाहीले धनुषामा सवारी दुर्घटनाको आँकडालाई न्यूनिकरण गर्न यो कार्यक्रम महत्वपूर्ण हुने बताए ।