जनकपुरमा मैथिली विकास कोषको भवन उद्घाटन गर्दै देउवाले भने, 'मधेशलाई जनक प्रदेश बनाऔँ '

न्यूज ब्यूरो, जनकपुरधाम । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले मधेश प्रदेशको नाम ‘जनक’ वा ‘जानकी प्रदेश’ राख्न उपयुक्त हुने प्रस्ताव गरेका छन् ।

शुक्रबार जनकपुरधाममा मैथिली विकास कोष भवन’ उद्घाटन समारोहलाई सम्बोधन गर्दै देउवाले राजा जनकको ऐतिहासिक योगदान र सांस्कृतिक प्रभावको चर्चा गर्दै प्रदेशको नाम जनक वा जानकी राख्दा पहिचान र गौरव अझ प्रस्ट हुने तर्क गरे ।

‘राजा जनक केवल साधारण राजा थिएनन्, उनी राजर्षि थिए,’ देउवाले भने, ‘सिंगापुर, मलेसिया, थाइल्यान्डलगायत देशहरूमा समेत जनकको प्रभाव देखिन्छ ।’

उनले मैथिली भाषा र संस्कृतिको संरक्षण तथा प्रवर्द्धनमा संस्थागत रूपमा कार्य हुनुपर्ने बताए । देउवाले कोषको भवनजस्तै भाषिक तथा सांस्कृतिक विकास पनि भव्य र परिणाममुखी बनाउन आग्रह गरे । ‘भवन भौतिक पूर्वाधारमा मात्र सीमित नहोस्,’ उनले भने, ‘मैथिली परम्परा, भाषा, साहित्य र कलाको संरक्षण तथा प्रवर्द्धन गर्ने थलो बनोस् ।’

देउवाले यो भवन नयाँ पुस्तालाई भाषा, ज्ञान, सीप र संस्कृति हस्तान्तरण गर्ने प्लेटफर्मको रूपमा उपयोग गर्न सुझाए ।संविधानले मैथिलीलाई राष्ट्रिय भाषा मानेकाले यसको संरक्षण र सम्वर्द्धनमा कोषले पनि अग्रसरता लिनुपर्ने उनको भनाइ थियो ।