मधेशमा एक लाख रोजगारीः प्रदेश सरकारले ल्यायो ऐतिहासिक नीति तथा कार्यक्रम

न्यूज ब्यूरो, जनकपुरधाम । मधेश प्रदेश सरकारले आगामी आर्थिक वर्षका लागि ल्याएको नीति तथा कार्यक्रमले देशभरको ध्यान खिचेको छ। “एक लाख रोजगारी” सिर्जना गर्ने महत्वाकांक्षी अवधारणासहित सार्वजनिक गरिएको यो योजना अहिले चर्चाको शिखरमा छ।

प्रदेशसभामा प्रस्तुत नीति तथा कार्यक्रममा कृषि, लघु तथा घरेलु उद्योग, सहकारी, पर्यटन, वैदेशिक रोजगार व्यवस्थापन, उद्यमशीलता र डिजिटल प्रविधिलाई मुख्य आधार बनाइएको छ।

विशेष गरी युवालाई लक्षित गरी रोजगारीको अवसर बढाउने उद्देश्यसहित मधेशमा रोजगारी अभियान सुरू गरिने जनाइएको छ। मधेश सरकारले आज आगामी आर्थिक वर्ष २०८२÷८३ को नीति तथा कार्यक्रम सार्वजनिक गरेपछि एक लाख रोजगारीको अवधारणाको चर्चा चुलिएको छ ।

जनमत पार्टी नेतृत्वको मधेश सरकारले दोस्रो पटक नीति तथा कार्यक्रम ल्याउँदा नयाँ शैली, नयाँ योजना, नयाँ गन्तव्य र नयाँ अवधारणा समेत समावेश गरेको छ । जनमत नेतृत्वमा सरकार बनिरहे मधेश प्रदेशमा समृद्धि आउने विश्वास लिइएको छ ।

मधेश प्रदेशसहित देशभर अहिले भ्रष्टाचारको मुद्दा बढ्दै छ । यस्तो समयमा प्रदेश सरकारले ‘मेरो पैसा कहाँ जान्छ’ अभियान चलाउने घोषणा गरेको छ । प्रदेश प्रमुख भण्डारीले प्रादेशिक बजेटको विनियोजन र खर्चको पारदर्शिता, प्रवर्द्धन तथा लेखाजोखा गर्न उक्त अभियान सञ्चालन गरिने घोषणा गरिन् ।

उनले समृद्धि मधेश, समृद्ध राष्ट्रको आधार मार्गदर्शन सिद्धान्त अनुसार सामाजिक न्याय, आर्थिक समावेशिता र पूर्वाधार विकास लगयतका क्षेत्रहरुमा दिगो विकास लक्षित कार्यक्रमहरु सञ्चालन गरिने बताइन् ।

मधेस सरकारले मयूरको संरक्षण तथा प्रवर्द्धन, मखान खेतीको विस्तार, ऋण कार्डको व्यवस्थासहितका केही नयाँ योजना सार्वजनिक गरेको छ ।