IPL 2025: RCB ले जितको खुसी मनाउँदै गर्दा मुद्दा दायर

न्यूज ब्यूरो, जनकपुरधाम । १८ बर्षपछि आईपिएस २०२५ को उपाधी जितेका आरसिबीमाथि मुद्दा दायर भएको छ । टीमले जीतको खुसी मनाउँदै गर्दा मुद्दा दायर भएको हो ।

पहिलोपटक आईपीएल उपाधि जितेको खुशी सेलाउन नपाउँदै आरसिबी कानुनी झमेलामा फसेको हो।

बेंगलुरुमा बुधबार भएको विजय र्‍यालीका क्रममा भएको भागदौड घटनामा आरसीबी, एक इभेन्ट म्यानेजमेन्ट कम्पनी (डीएनए) र कर्नाटक क्रिकेट संघविरुद्ध आपराधिक लापरवाहीको आरोपमा प्रहरीमा जाहेरी दर्ता भएको छ ।

कर्नाटक प्रहरीका अनुसार बुधबार भएको विजय जुलुसको बेला चिन्नास्वामी रंगशालाबाहिर भीड अनियन्त्रित भई मच्चिएको भागदौडमा ११ जनाको मृत्यु भएको थियो । घटनामा ३३ जना घाइते भए। मृतकहरूमा अधिकांश ३५ वर्षभन्दा कम उमेरका छन । जसमा तीन किशोरसमेत छन्।

सुरक्षा व्यवस्थाको कमी र जिम्मेवार निकायहरूको लापरवाहीले यो घटना भएको जाहेरीमा उल्लेख गरिएको छ । घटनापछि कर्नाटक उच्च अदालतमा सुनुवाइ भएको छ।

कार्यवाहक प्रमुख न्यायाधीश वी. कामेश्वर राव र न्यायाधीश सी।एम। जोशीको इजलासले राज्य सरकारलाई १० जुनभित्र स्थिति विवरण पेश गर्न निर्देशन दिएको छ।

जाहेरीकर्ताका कानुन व्यवसायीले अदालतसमक्ष राज्य सरकारले आरसीबी खेलाडीहरूलाई सम्मान गर्ने निर्णय किन गर्‍यो भन्ने जवाफ खोजेका छन् । देशको तर्फबाट नखेलेका खेलाडीलाई यस्तो विशेष सम्मान दिनुपर्ने बाध्यता के हो ? भनेर उनले प्रश्न गरे ।

विवादको जरो त्यही दिनको सरकारी सम्मान कार्यक्रम थियो, जहाँ पहिलोपटक आईपीएल उपाधि जितेको आरसीबी टोलीलाई विधानसभा परिसर र त्यसपछि चिन्नास्वामी स्टेडियममा सम्मान गरिएको थियो।

घटना हुँदा स्टेडियम बाहिर हजारौं समर्थकहरू जम्मा भएका थिए । निःशुल्क प्रवेशको अफवाह फैलिएपछि स्थिति भयावह बनेको प्रारम्भिक अनुसन्धानले देखाएको छ।