सभामुख मण्डलका सल्लाहकार र स्वकीय सचिव एमालेको चुनावी मैदानमा आएपछि नयाँ बहस सुरु

न्यूज ब्यूरो, जनकपुरधाम । नेकपा एमालेको ८औं धनुषा जिल्ला अधिवेशनमा मधेस प्रदेशका सभामुख रामचन्द्र मण्डलका सचिवालय सदस्यहरू चुनावी मैदानमा उत्रिएपछि नयाँ बहस सुरु भएको हो।

सभामुखका राजनीतिक सल्लाहकार जिल्ला अध्यक्ष पदका उम्मेदवार बनेका छन् भने उनका ज्वाईं समेत रहेका स्वकीय सचिव रमेश मण्डल जिल्ला सदस्यमा र अर्का स्वकीय सचिव धिरेन्द्र मण्डल सचिव पदमा प्रतिस्पर्धी बनेका छन्। यसरी सभामुखकै सचिवालयका प्रमुख सदस्यहरूको संगठित रूपमा उम्मेदवारी दिनु नीतिगत र नैतिक दृष्टिले आपत्तिजनक भएको भन्दै कार्यकर्ताहरूले प्रश्न उठाएका छन्।

यसका साथै उम्मेदवारहरूद्वारा प्रतिनिधिहरूलाई विभिन्न योजना सञ्चालन गर्ने आश्वासन दिने, विकासका नाममा प्रलोभन देखाउनेजस्ता गतिविधिहरू भएको आरोप समेत सार्वजनिक रूपमा आउन थालेको छ। कतिपय प्रतिनिधिहरूले योजना, बजेट र सरकारी पहुँचको आडमा मत प्रभावित पार्न खोजिएको भन्दै गुनासो गरेका छन्।

पार्टीको संगठनात्मक मर्यादा विपरित हुने गरी सत्ताको आडमा चुनावी प्रतिस्पर्धामा सचिवालयका सदस्यहरू लाग्नुले सभामुख रामचन्द्र मण्डल स्वयम् राजनीतिक रूपमा सक्रिय भएको स्पष्ट संकेत दिएको विश्लेषण भइरहेको छ। यस्ता गतिविधिले पार्टीभित्रको आन्तरिक लोकतन्त्र, निष्पक्षता र पारदर्शितामा गम्भीर प्रश्न उठाएको छ।

यसैबीच, निर्वाचन प्रक्रिया अघि नबढ्दै कुर्सी तोडफोड र कुटाकुटको घटना घटेको थियो, जसमा चार जना घाइते भएका थिए। निर्वाचन २०८२ जेष्ठ ७ गतेका लागि तोकिएको छ, तर वातावरण उत्तेजक बन्दै गएको छ।