सिरहामा दुई ट्याक्टर दुर्घटना, एकको मृत्यू, एक घाइते

न्यूज ब्यूरो |

सिरहा, २२ असार । सिरहामा ट्याक्टर पल्टिँदा एकजनाको मृत्यू भएको छ । सिरहाको बरियारपट्टी गाउँपालिका–२ जानकीनगरमा शुक्रवार ट्याक्टरले किच्दा चालककोे मृत्यु भएको हो ।

खेत जोत्ने (हिलो गर्ने) क्रममा शुक्रवार दिउँसो करिब १ बजे स १ त ३१९४ नम्बरको ट्याक्टर अचानक पल्टिँदा सोही ट्याक्टरले किचिएर चालक बरियारपट्टी गाउँपालिका–२ जानकीनगर निवासी उदय मण्डलको घटनास्थलमै ज्यान गएको जिल्ला प्रहरी कार्यालय सिरहाका डिएसपी माधव रावत खरेलले जानकारी दिए ।

मृतकको शव पोस्टमार्टमको लागि लहान लैजाने तयारी भइरहेको डिएसपी खरेलले बताए ।

यस्तै, लहान नगरपालिका वडा नं. १८ मा स १ त ६०९८ नम्बरको ट्याक्टर पल्टिँदा एकजना घाइते भएको छ । घाइते हुनेमा सोही वडाका ३५ वर्षीय बलि सदाय रहेका छन् । उनको उपचार लहानमा भइरहेको डिएसपी खरेलले जानकारी दिनुभयो ।