धनुषाधाममा माओवादीका वडाध्यक्षले लगाएको ताला काङ्ग्रेसले फुटाए

न्यूज ब्यूरो, जनकपुरधाम । विवादरहित रहँदै आएको धनुषाको धनुषाधाम नगरपालिकाका नव निर्वाचित वडाध्यक्ष सुनिल कापरले लगाएको ताला नेपाली काङ्ग्रेसका नेता कार्यकर्ताले फुटाईदिएको छ ।

धनुषाधाम नगरपालिकामा निर्वाध विकास निर्माणको कामहरु चलिरहेको बेला उपचुनावबाट नयाँ निर्वाचित भएका वडाध्यक्ष कापरले कार्यपालिकाको बैठक चलिरहेकै बेला ताला लगाएपछि काङ्ग्रेसहरुले तोडेका छन् ।

कार्यपालिकाको बैठकको लागि मेयर बालेश्वर मण्डलले पटक पटक आउन आग्रह गरेपनि उनी राजनीतिक पार्टीको दबाबमा आएनन् । एकैपटक माओवादीका कार्यकर्ताहरुको टोली लिएर नगरपालिकामा तला लगाएपछि सोही नगरपालिकाका काङ्ग्रेस कार्यकर्ताहरुले ताला फुटाइदिएका हुन् ।

निरन्तर दोस्रो कार्यकाल सम्हालेका मेयर बालेश्वर मण्डल धनुषामा विवादरहित मेयरको रुपमा चिनिन्छन् । धनुषा जिल्लामै धनुषाधाम नगरपालिकामा समयमै नगरसभा, समयमै बजेट, समयमै विकास निर्माणका कार्यहरु हुँदै आएको छ । विगत ७ बर्षदेखि धनुषाधाममा कुनै पनि विवाद थिएनन् । उपचुनावबाट विभिन्न पार्टीको एकताबाट माओवादी पार्टीबाट जितेका वडाध्यक्ष कापरले माथिल्ला तहका कार्यकर्ताको उक्साहटमा ताला हानेपछि बेईज्जत हुनु परेको वडाध्यक्षहरुले बताएका छन् ।

विरोधकै लागि विरोध जनाएको भन्दै वडाध्यक्षहरुले बिना कुनै विवादको नगरपालिका चलिरहँदा पार्टीको हिसाबले अवरोध खडा गर्न खोजे आफूहरु जवाफ दिन तयार रहेको बताएका छन् ।

स्थानीयहरुले समेत नाराबाजी गर्दै ताला फुटाएका हुन् ।