प्लान इन्टरनेश्नल र जानकी महिला जागरण समाजले ल्याइदिए सबितालाई नयाँ खुसी

न्यूज ब्यूरो, जनकपुरधाम । धनुषाको जनकनन्दिनी गाउँपालिका वडा नम्बर ५ उदहा बस्ने सबिता कुमारी मण्डल अहिले हर्षित छिन् ।

समाजिक सँस्था प्लान इन्टरनेश्नल र जानकी महिला जागरण समाज जनकपुरले सबितालाई नयाँ खुसी उपहार दिएपछि उनी अहिले मख्ख छिन् । करिब ८ महिना अगाडी दुवै सँस्थाले जनकनन्दिनी गाउँपालिको समन्वयमा उनलाई नयाँ पसल थाप्न सहयोग गरेपछि उनी अहिले परिवार धान्न सक्ने क्षमता बनाएकी छन् ।

प्लान इन्टरनेश्नलको आयोजन, जानकी महिला जागरण समाजको सहयोग र जनकनन्दिनी गाउँपालिकाको समन्वयमा सबितालाई नयाँ किराना पसल खोल्न मदत गरिदिएपछि अहिले उनी आफ्नो परिवार धान्न समक्ष भएकी बताउँछिन् ।

सबिताको श्रीमान अशोक मण्डल वैदेशिक रोजगारीमा रहँदा मोबाईलमा मात्र व्यस्त रहने सबिताले प्लान इन्टरनेश्नल र जानकी महिला जागरण समाजले दिएको स्वरोजगार तालिम प्राप्तपछि उनले पसल सँचालन गरिन् । पसल सँचालनपछि उनी अहिले दैनिक रुपमा ५०० देखि १००० रुपैयाँसम्म आम्दानी गर्न सकेपछि परिवारको दैनिक खर्च मज्जाले चलाउन सकेको बताएकी छन् ।

अनुगमनमा पुगेका गाउँपालिकाका कर्मचारीहरु, बीचमा सबिता मण्डल

विहिबार जनकनन्दिनी गाउँपालिकाको तर्फबाट गाउँपालिका उपाध्यक्ष कमला सहगल, प्रमुख प्रशासकीय अधिकृत अयोधी दास, रोजगार सेवा केन्द्रका प्रमुख सुरेन्द्र कुमार यादव र रञ्जय यादवसहितको टोलीले अनुगमन गर्न पुग्दा सबिताले पसलमै आफ्नो खुसी दर्साइन् ।

उनले भनिन्,–“यसअघि म घरमै बसिबसाउ थिएँ, काम पनि थिएन, घरको काम सकेर मात्र घरमै बस्नुपर्ने बाध्यता थियो, त्यतिकै दिनभरि मोबाईल चलाएर बस्थे । सरहरुले तालिम दिएपछि, ज्ञान, सीप सिकाएपछि मैले पसल खोल्ने निधो गरे । हुनतः मेरा श्रीमान हुँदा पनि पसल थियो ३ ४ बर्ष अगाडी । कठघेरा हुँदै गर्दा पसल थापे, पसल म आफैँ सँचालन गरेको छु । अब परिवारिक खर्च धान्न सजिलो भएको छ । एउटा छोरा छ, बोर्डिँग स्कूलमा पढाउँदैछु । उनको पढाईएको खर्च, सासु ससुराको औषधी उपचार र अन्य खर्च पसलकै कमाईले धान्न सकेको छु । म धेरै खुसी छु । उहाँहरुले बाटो देखानुभयो, म खुसी छु ।”

प्लान इन्टरनेश्नल र जानकी महिला जागरण समाजले जनकन्दिनी गाउँपालिकामा ४५ जनालाई तालिम दिएको छ । जसमध्ये २४ जनाले व्यवसायिक तालिम लिएका छन् भने १५ जनालाई आर्थिक सहयोग गरिएको तथा ६ जनालाई विभिन्न ठाउँमा रोजगार लगाइदिएको जानकी महिला जागरण समाजकी अनुगमन तथा मूल्याँकन अधिकृत सुस्मिता ठाकुरले जानकारी दिइन् ।

ठाकुरका अनुसार, १८ देखि २४ बर्षका युवाहरु रोजगार तथा आर्थिक सशक्तीकरणको लागि तयार पार्न सफल भएको बताईन् । उनले जनकनन्दिनी गाउँपालिकामा सबिता तालिमपछिको एक प्रतिनीधि पात्र मात्र भएको बताउँदै सबिताजस्तै ४५ जना महिला पुरुष युवाहरुलाई आर्थिक रुपमा सशक्त पारिएको दाबी गरिन् ।

उनले जनकनन्दिनी गाउँपालिकाको ६ वटै वडाबाट महिला पुरुषहरुलाई रोजगार, स्वरोजगार र आर्थिक रुपमा सहयोग गरेको बताईन् । यो परियोजना निरन्तर चलिरहने उनले बताईन् ।

अनुगमनको क्रममा जनकनन्दिनी गाउँपालिकाकी उपाध्यक्ष कमला सहगलले समाजिक सँस्था प्लान इन्टरनेश्नल र जानकी महिला जागरण समाजको परियोजनाप्रति कृतज्ञता प्रकट गरिन् । उनले आफ्नो पालिकाभित्रको महिला पुरुष युवाहरुलाई आर्थिक सशक्तिकरणमा टेवा पुरयाएकोप्रति खुसी प्रकट गरिन् । उनले यस्ता कार्यक्रम निरन्तरता दिन आग्रह समेत गरिन् ।

सोही अनुगमनको क्रममा प्रमुख प्रशासकीय अधिकृत अयोधी दासले सँस्थाहरुको लगानी तथा गाउँपालिकाको समन्वयमा भएको कार्यक्रमको प्रतिफल उत्तम पाएको बताए । उनले सबिताको खुसी देखेर अन्य ४४ जनाको आर्थिक सशक्तिकरण बलियो हुँदै गएको जानकारी दिए ।

अनुगमनमा प्लान ईन्टरनेश्नलको परियोजना अधिकृत किशोर कर्ण, समाजिक परिचालन अधिकृत महिमा सोनाली मगरले परियोजनाको आगामी कदमको बारेमा प्रकाश पारेका थिए ।