धनुषामा दुर्घटना रोकथामको लागि ट्राफिक ईन्सपेक्टर ओलीको 'ट्राफिक सचेतना अभियान'

न्यूज ब्यूरो, जनकपुरधाम । धनुषामा दुर्घटना रोकथाम तथा न्यूनिकरणको लागि ट्राफिक प्रहरीले सचेतना अभियान सुरु गरेको छ ।

धनुषा ट्राफिक प्रहरी प्रमुख हरि ओलीले मँगलबारदेखि धनुषा जिल्लाको विभिन्न स्थानमा ट्राफिक सचेतना अभियान गरेको हो । ईन्सपेक्टर ओलीले जनकपुरधाम क्षेत्रभित्र आफैँ सचेतनामा सक्रिय भए भने जिल्लाको विभिन्न युनिटलाई निर्देशन दिँदै राजमार्ग र लोकमार्गहरुमा ट्राफिक सचेतना अभियान चलाए ।

अत्यधिक चिसो र हुस्सुको कारण हुन सक्ने सवारी दुर्घटना न्यूनिकरण सम्बन्धी बालबालिकाहरुलाई सचेतना दिइएको ईन्सपेक्टर ओलीले बताए । उनका अनुसार, सवारी चालकहरुदेखि लिएर साईकल चालकहरुलाई समेत ट्राफिक नियम सम्बन्धि जानकारी गराएको बताए ।

स्कूले बालबालिकाहरुलाई, विद्यार्थीहरुलाई सडकमा रोकेर ट्राफिक चिन्हहरुको बारेमा वर्णन गरिएको जनाए । यसका साथै, विद्यालयहरुमा समेत पुगेर ट्राफिक प्रहरीले ट्राफिक बारे सचेतना दिएको हो ।

सो क्रममा स्कूल बसहरुमा क्षमताभन्दा अधिक बालबालिका राखेको, झ्याल खोलेको सम्बन्धमा सवारीहरुमा अनुगमन समेत गरिएको थियो । अनुमगनबाट कारवाही गरिएको जनाइएको छ ।

बालबालिकाहरुलाई जेब्रा क्रसिँगको बारेमा विशेष रुपमा जानकारी गराईएको इन्सपेक्टर ओलीले बताए । उनका अनुसार, जिल्लाको दर्जन बढी स्थानमा सचेतना कार्यक्रम गरिएको हो ।