नाम र धर्म परिवर्तन गरी बस्दै आएका हत्या मुद्दाका फरार अभियुक्त ४० बर्षपछि पक्राउ

न्यूज ब्यूरो, जनकपुरधाम । मधेश प्रदेश प्रहरी कार्यालय जनकपुरले एक अभियुक्तलाई सजाए सुनाएको २३ बर्षपछि पक्राउ गर्न सफल भएको छ ।

जिल्ला प्रहरी कार्यालय सिरहाका प्रहरी नायब उपरीक्षक (डिएसपी) बीरेन्द्र कुमार पासवान कमाण्डको टोलीले हत्या घटनाको ४० बर्षपछि एक अभियुक्तलाई पक्राउ गर्न सफल भएको हो ।

वि.सं. २०४१ साल चैत्त १६ गतेमा रौतहटका लेखापढी व्यवसायी ललन सिंहको हत्या आरोपमा राजु सिँहलाई पक्राउ गरिएको हो ।

घटनाको १६ वर्षपछि गत वि. सं. २०५७ साल फागुन २६ गतेमा रौतहट जिल्ला अदालतले हत्यामा चारजनालाई दोषी ठहर गर्दै सजायको फैसला गरेकोमा कैद सजाय पाएकामध्ये तीनजना फरार थिए । लामो समयदेखि प्रहरीले उनीहरूको खोजी गरिरहेको थियो ।

केही दिनअघि मधेश प्रहरीले लेखनदास ललन सिंहको हत्यमा कैद सजाय पाएका राजु सिंह सर्लाहीको चक्रघट्टामा बसिरहेका खवर पाएपछि सिरहाका डिएसपी पासवानको नेतृत्वमा टोली खटाएको थियो । प्राप्त सूचना पछ्याउँदै प्रहरी चक्रघट्टा गाउँपालिका वडा नम्बर ४ को सुन्दरपुरमा नाम, धर्म र बुवाको नाम सबै परिवर्तन गरी बसिरहेको सिँहलाई पक्राउ गरेको जनाइएको छ ।

प्रहरी त्यतिवेला चकित पर्‍यो, जब नियन्त्रणमा लिइएका व्यक्तिले आफू राजु नभई मोहम्मद सराज राइन भएको परिचयपत्र देखाए । त्यही नामको नागरिकतासमेत देखाए । प्रहरी अन्योलमा पर्‍यो । तर, सूचना दिनेले पहिचान र धर्मसमेत परिवर्तन गरेर बसेको सूराक दिएकाले प्रहरीले ती व्यक्तिलाई नियन्त्रणमा लिएर अनुसन्धान अगाडि बढायो ।