न्यूज ब्यूरो प्रभाव : समाजसेवी साहले लिए "रञ्जन" लाई उच्च शिक्षा पढाउने जिम्मा

न्यूज ब्यूरो |
जनकपुरधाम, १४ असार । कलिलो उमेरमै आमा गुमाएका धनुषाका एक बालकको उच्च शिक्षासम्म अध्ययन अध्ययापनको जिम्मेवारी उठाइएको छ ।

न्यूज ब्यूरो अनलाईनमा "कलिलोमै आमा गुमाएपछि असहाय बने रञ्जन , कसले देला साथ ? भन्ने शिर्षको समाचार प्रकाशित भएपछि जनकपुरमा समाजसेवी बैद्यनाथ साहले रञ्जनलाई उच्च शिक्षासम्म पढाउने जिम्मा लिएका हुन् ।

समाजसेवी साहले आज अपरान्ह रञ्जनका वुवासँग भेटघाट गर्दै जनकपुरमा पढे वा काठमान्डौँमा पनि अध्ययन गरे त्यसको सम्पूर्ण जिम्मेवारी आफू लिने भनेर प्रतिवद्धता जनाएका हुन् ।

"मैले आमाको किरियामा बसेका बालक रञ्जनसँग कुरा गरे, उनको बुवासँग पनि कुरा गरे , यदि उ जनकपुरमा पढन चाहन्छन् भने म सम्पूर्ण जिम्मेवारी उठाउँछु, यदि उसलाई यहाँ समस्या महसुस भएर आफ्नी दीदीसँगै काठमान्डौँ नै पढ्ने भएपछि पनि त्यसको जिम्मेवारी म वहन गर्नेछु यो मेरो वाचा हो । दुवै दीदी काठमान्डौँ नै पढने भएकोले यहाँ उसलाई एक्लो राख्न पनि कठिन हुनेछ , वुवा वैदेशिक रोजगारीमा रहँदै आएको छ ।" समाजसेवी साहले भने ।

असहाय संरक्षण मञ्चका अध्यक्ष समेत रहेका समाजसेवी साहले रञ्जनको उच्च शिक्षा सम्म पढने सम्पूर्ण जिम्मेवारी आफू लिएको भनेर न्यूज ब्यूरोसँग भने । समाजसेवी साहले विभिन्न समयमा यस्ता असहायहरुलाई निरन्तर सहयोग गर्दै आएका छन् ।

आमाको मृत्यू ब्रेन ह्यामरेज भएर भएको तथा त्यति बेला न्यूरो सर्जन डाक्टर उपलब्ध नभएकै कारण आमाको मृत्यू भएको भन्दै अब न्यूरो सर्जन नै बन्ने दृढता प्रकट रञ्जनले गरेका छन् ।

आर्थिक स्थिति अति नै कमजोर रहेको तथा ऋणमै डुबेका जनकपुर उपमहानगरपालिका वडा नं. १७ कनकपट्टी बस्ने तथा हाल जनकपुर २ विद्यानगर बस्दै आएका चन्द्रशेखरकी ३२ बर्षिय श्रीमतिको ब्रेन ह्यामरेज भएर अकाल मृत्यू भएपछि छोराछोरीहरु विच्चलीमा परेका छन् ।

कलिलो उमेरमै आमाको माया र छाया खोसिएपछि खानपिना समेत छाडेका उनीहरुले ऋणको भारले समेत रातराती सुत्न सकेको अवस्था छैन ।

दुई छोरी र एक छोरा रहेका चन्द्रशेखरले छोरोका पठनपाठनको जिम्मेवारी बहन गरेको भन्दै समाजसेवी साहलाई धन्यवाद तथा आभार प्रकट गरे ।

यता, माईली छोरी समेत कक्षा १२ मा अध्ययनरत रहेकी छन् भने उनलाई पनि अध्ययन अध्ययापनको जिम्मेवारी बहन गर्ने सहयोगी हात, सहयोगी मनको प्रतीक्षामा बसेका छन् ।

अस्पतालमा उपचारमै मोटो रकम खर्च भएपछि शर्मा परिवार झन ऋणको बोझ उठाउन बाध्य भएका छन् ।

समाजसेवी साहलाई न्यूज ब्यूरो टिम स धन्यवाद ज्ञापन गर्दछ ।