बालविवाह अन्त्यका लागि महोत्तरीमा अन्तरक्रिया कार्यक्रम सम्पन्न

न्यूज ब्यूरो |

महोत्तरी, १२ असार । बालविवाह अन्त्यका लागि महोत्तरीमा आज (मंगलवार) अन्तरक्रिया कार्यक्रम गरिएको छ । महोत्तरीको एकडारा गाँउपालिका वडा नं. ३ भटौलियामा बालविवाह सम्बन्धी एकदिने अन्तरक्रिया कार्यक्रम सम्पन्न भएको हो ।

सहभागी अधिकांश व्यक्तिहरुले बालविवाह हुँदा हुने समस्याहरुको बारेमा मन्तव्य प्रकट गरेका थिए । सहभागीहरुले गरिबी, अशिक्षा र चेतनाको कमिले बाल बिवाह बढ्दै गएको उनीहरुले बताएका छन् । अशिक्षा र चेतनाको कमिले बाल विवाहले अझै पनि समाजमा जडा गाडदै आएको देखिन्छ । बालबालिका सम्बन्धी ऐन, कानुन बनेका छन् तर प्रभावकारी रुपमा कार्यान्वन हुन सकेका छैनन् ।

बालविवाह गरिदिँदा बालबालिका शिक्षाबाट बञ्चित हुनपुगेका समेत औल्याए । लाली गुराँस बाल क्लबको आयोजना र एकडारा गाँउपालिकाको सह—आयोेजनामा भएको सो कार्यक्रमका प्रमुख अतिथि गाँउपालिकाका अध्यक्ष राम छबिला साहले बालविवाहको उन्मूलन गर्न विशेषगरी केटीहरूलाई सशक्तिकरण गर्नुपर्ने बताए । बाल विवाह बालअधिकार, महिला अधिकार, मानव अधिकार र विकासको बाधक हो । बाल विवाह पुराना परम्परागत संस्कृति र जातिय व्यबस्थासँग जोडिएकाले सर्बप्रथम त्यस्ता संस्कृति र जातिय व्यवस्थालाई बदल्नुपर्ने उनले जिकिर गरे ।

समुदायका मानिसहरूले सामाजिक मूल्य, इज्जतका कारण वालविवाह बिरुद्ध बोल्नसकेका छैनन् । कतिपय ठाउँमा बाल विवाहबिरुद्धका उजुरीहरू दर्ता नभएको गनासो समेत देखिएको छ । खराब राजनीतिक अबस्थाका कारणले पनि बालविवाह बिरुद्धको अभियान प्रभावकारी हुन नसकेको गाँउपालिकाका उपाध्यक्ष तथा कार्यक्रमका विशिष्ट अतिथि महजिद खातुनले बताइन् । बालविवाह गैरकानुनी भएको र यसबाट बालबालिकाले शारीरिक, मानसिक र शैक्षिक विकासको अवसर र रहर सबै गुमाउन पर्ने हुँदाहुँदै यस्तो गलत परिपाटीका विरुद्ध संगठित आवाज उठाउनुपर्ने धारणा समेत राखिन ।

कार्यक्रमको सहयोगी संस्थाको रुपमा मेनी नेपाल रहेको सो संस्थाका सदस्य चुडामनी यादवले जानकारी दिए । कार्यक्रममा एकडारा गाँउपालिका वडा ३ का अध्यक्ष रामविलास राय, लाली गुराँस बाल क्लवका अध्यक्ष सुदिष प्रसाद चौरसिया, स्थानीय बुद्धिजिवी, समाजसेवी, नागरिकसमाज, किशोर-किशोरी लगायतका उल्लेखनीय सहभागिता रहेको थियो । कार्यक्रमको सहजीकरण मेनी नेपालका सदस्य रक्की साहले गरेका थिए ।