जिल्लामै सबभन्दा पहिले धनुषाधाम नगरपालिकाले भ्याए नगरसभा, ल्याए ५५ करोड बढीको बजेट

शंकर प्रसाद यादव, जनकपुरधाम । धनुषा जिल्लामै सबभन्दा पहिले धनुषाधाम नगरपालिकाले बजेट ल्याउन सफल भएको हो । आर्थिक बर्ष २०८१÷०८२ को लागि त्यहाँका जनप्रतिनीधिहरु र कर्मचारीहरुको कुशल कार्य सम्पादनलाई झल्काएको छ ।

प्रत्येक बर्ष समयमै सभा गरी बजेट ल्याएर नजीर कायम गरेको धनुषाधाम नगरपालिकाले यसपाली समय अगाडी नै बजेट ल्याउन सफल भएको हो । अन्य स्थानीय तहहरु असार १० गते बजेट ल्याउने तरखरमै रहेको बेला धनुषाधाम नगरपालिकाले ५५ करोड बढी बजेट ल्याएको हो ।

शुक्रबार धनुषाधाम नगरपालिकाका नगर प्रमुख बालेश्वर मण्डलले आर्थिक बर्ष २०८१÷०८२ को लागि ५५ करोड ५८ लाख ९४ हजार रुपैयाँको बजेट ल्याएको हो । नगरपालिकाका जनप्रतिनीधिहरुको सँयुक्त प्रयासले असार ७ गते नै बजेट ल्याउन सफल भएको हो ।

“सम्मुनत, समृद्ध, सभ्य धनुषाधाम” निर्माणको मूल नारालाई आत्मसात गर्दै धनुषाधामको कृषि उर्वर भूमिलाई सदुपयोग गर्न कृषिमुखी बजेट ल्याइएको नगर प्रमुख (मेयर) बालेश्वर मण्डलले जानकारी दिए । उनले गरिबीको रेखामुनी रहेका नागरिकलाई माथि उकास्नको लागि विभिन्न योजना तहत कार्य हुने बताए ।

उनले महिला अधिकार र महिलाहरुलाई उद्यमी बनाउने मूल लक्ष्यसहित आयआर्जनका नीतिलाई प्राथमिकताका साथ अवलम्बन गर्ने गरी नीति कार्यक्रम ल्याएको बताए । धनुषाधाम नगरपालिकाको नागरिकको लागि आर्थिक समृद्धि मूलमन्त्रलाई आत्मसात गरिने बताए ।

भौतिक पूर्वाधार क्षेत्रमा तीव्र विकास निर्माण गरेको बताउँदै यसपालीको बजेटलाई किसानमुखी बनाइएको बताए । कृषि क्षेत्रलाई लक्षित गरी नीति योजना सँचालन हुने सके धनुषाधाम समृद्ध हुने विश्वास उनले लिए ।

दोस्रो कार्यकाल हाँकिरहेका नगर प्रमुख मण्डलले सम्पूर्ण वडाध्यक्ष, वडासदस्य, कार्यपालिका सदस्य, कर्मचारीहरुको सहयोगले जनमुखी बजेट ल्याएकोप्रति कृतज्ञा प्रकट गरे ।

१४ औँ नगरसभामा नीति कार्यक्रम प्रस्तुत गर्दै उपप्रमुख विद्या देवी भूजेलले महिला हकहिक, महिला संरक्षण, महिला उद्यमी र महिला सरोकारको विषयलाई नीति तथा बजेटमा समावेश गरिएको बताईन् । उनले न्यायिक समितिमा प्रखर पहुँच बनाउनको लागि नयाँ अभियानहरु समेत सँचालन गरिने बतार्र्ईन् ।

निमित्त प्रमुख प्रशासकीय अधिकृत सँजीत दासको विशेष उपस्थितिमा सम्पनन १४ औँ नगरसभाबाट कर्मचारी हकहितको लागि समेत स्थानीय सरकारको समन्वयमा थप नीति नियमहरु लागू गरिने बताईएको छ ।

सभामा सबै वडाका वडाध्यक्ष, वडा सदस्य, कार्यपालिका सदस्य, सम्पूर्ण कर्मचारीहरु, स्थानीय बुद्धिजीवीहरु, राजनीतिक दलका प्रतिनीधिहरुको समेत उपस्थिति रहेको थियो ।