धनुषामा हात्ती आतंक, प्रहरीले गरे ५ राउण्ड फायर ,दर्जन बढी घरमा तोडफोड

न्यूज ब्यूरो |
जनकपुरधाम, २४ जेठ । धनुषामा हात्तीले आतंक मच्चाउँदा स्थानीयहरु त्रसित भएका छन् ।

धनुषाको मिथिला नगरपालिका वडा नं. ७ स्थित आज विहानै करिब ४ बजे जँगली हात्ती गाउँ पसेर वितण्डमा मच्चाएपछि स्थानीयहरु त्रसित भएका थिए ।

विहानै गाउँ पसेर जँगली हात्तीले स्थानीयहरुको १९ वटा घरमा तोडफोड गरेको छ भने कुनै प्रकारको मानवीय क्षती वा चौपाया क्षति नभएको जिल्ला प्रहरी कार्यालय धनुषाले जनाएको छ ।

जँगली हात्ती गाउँ पसेको खवर स्थानीयहरुले ईलाका प्रहरी कार्यालय ढल्केवरलाई दिएपछि तुरुन्तै एक्सनमा आएका प्रहरीले घटनास्थल पुगी ५ राउण्ड फायर गरेर हात्ती धपाएका हुन् ।

प्रहरीले एसएलआर राईफलबाट हात्ती धपाउन ५ राउण्ड हवाय फायर गरेपछि हात्ती पुनः जँगल पसेको प्रहरीले जनाएको छ ।

अहिले त्यहाँको अवस्था समान्य रहेको छ ।