प्रदेश २ सरकारको नीति तथा कार्यक्रम जेठ २४ को हुने

न्यूज ब्यूरो |
जनकपुरधाम, २१ जेठ । प्रदेश नम्बर २ को सरकारले नीति तथा कार्यक्रम २४ गते प्रदेश सभामा प्रस्तुत गर्ने भएको छ ।

प्रदेश सरकारले दोस्रो पटक नीति तथा कार्यक्रमहरु सार्वजनिक गर्न थालेको छ । पहिलो पटक सरकारले सदनमा प्रस्तुत गरेको नीति तथा कार्यक्रमको तीन महिना भित्रै अर्को नीति तथा कार्यक्रम प्रस्तुत गर्न लागिएको छ भनेर आजको जनकपुर टुडेमा समाचार छ ।

अगामी आर्थिक वर्षमा सरकारले गर्ने कार्यहरुलाई प्राथमिकतामा राखेर नीति तथा कार्यक्रम ल्याउन लागेको छ । प्रदेश सरकारले पहिलो पटक प्रस्तुत गरेका कयौं कार्यक्रमहरुले निरन्तरता पाउने छ ।प्रदेश सरकारले नीति तथा कार्यक्रममा ‘बेटी बचाउ, बेटी पढाउ’ जनतासित सरकार, कृषिमा अधारित साना, मझौला उद्योग, सिंचाई, कृषिलाई प्रोत्साहन लगायतका कार्यक्रमहरु आउने नीति तथा कार्यक्रममा समेटिने छ ।

‘सरकारको नीति तथा कार्यक्रम जेठ २४ गते सदनमा प्रस्तुत हुनेछ’ प्रदेश सरकारका प्रवक्ता समेत रहेका अर्थमन्त्री विजय कुमार यादवले भने, नीति तथा कार्यक्रमको तयारी भईरहेको छ ।सरकारको नीति तथा कार्यक्रम प्रदेश सभामा प्रदेश प्रमुख रत्नेश्वरलाल कायस्थले प्रस्तुत गर्ने छन् । सरकारलाई चाहिने बहुमत रहेकाले नीति तथा कार्यक्रम पारित हुन कुनै व्यवधान आउने छैन् ।

सरकारबाट समर्थन फिर्ता लिएको नेपाल कम्युनिष्ट पार्टी (नेकपा)ले सरकारको नीति तथा कार्यक्रम पारित गर्न सरकारलाई सघाउने बताईएको छ ।

संघिय सरकारमा संघिय समाजवादी फोरम नेपाल सहभागि भएकाले प्रदेश नम्बर २ सरकारको नेतृत्व गरिरहेको फोरम नेपाल र राजपा गठबन्धनको सरकारलाई सघाउने बताईएको छ ।

संघिय सरकारमा फोरम सहभागि भएपछि प्रदेशमा नेकपाको नेतृत्वमा सरकार बन्ने हल्लामा सत्यता नरहेको मन्त्री यादवले बताए ।‘फोरमले नेकपासित केन्द्रिय सरकारमा सहभागिताको लागि मात्र समझदारी गरेको छ ’उनले भने, प्रदेशमा राजपासितको गठबन्धन कायमै रहनेछ ।

नेकपाले सरकारबाट समर्थन फिर्ता लिएपछि प्रमुख प्रतिपक्षी दल बनेको छ ।नेपाली काँग्रेस विपक्षमा रहेको छ ।दुवै विपक्षी दलले सरकारको नीति तथा कार्यक्रम पारित गर्न सहयोग नगरेपनि सरकारसित रहेको बहुमतबाट नीति तथा कार्यक्रम सहजै पारित हुनेछ ।

विगतमा छुटेका प्रमुख एजेण्डाहरुलाई समेत नीति तथा कार्यक्रममा समावेश गरिने बताईएको छ ।मन्त्री यादवका अनुसार प्रदेश सभाको बैठक सोमवार दिउँसो १ बजे बस्ने भएको छ ।प्रदेशमा बजेट सेशन सुरु भईसकेको छ । सरकारको नीति तथा कार्यक्रम पारित भए लगतै अगामी आर्थिक वर्षको लागि बजेट ल्याईनेछ ।

सरकारको नीति तथा कार्यक्रममा टेकेर नै बजेट आउनेछ ।नीति तथा कार्यक्रमको तयारीसँगै प्रदेश अर्थ मन्त्रालयले बजेटका लागि सुझाव संकलन र लिपिबद्ध गर्ने कार्य प्रारम्भ गरिसकेको छ ।आजको जनकपुर टुडेमा समाचार प्रकाशित भएको छ ।