विदेशमै रहेको युवकको नाममा यादवले बनाए फर्जी तमसुक, गरिबको घरजग्गा रोक्का हुँदा बिच्चलीमा

न्यूज ब्यूरो, जलेश्वर । महोत्तरीमा एक जना साहुले एक युवकको नाममा फर्जी कागज बनाएर उनको घर जग्गा रोक्का गरिदिएको घटना बाहिरिएको छ ।

महोत्तरीको सोनमा गाउँपालिका वडा नं. १ सोनमा बस्ने जगदेव रायको छोरा विजय यादवले सोही स्थान बस्ने स्थानीय रामदेव साहका छोरा अजय कुमार साहको नाममा फर्जी कपाली तमसुक बनाएर जग्गा जमिन रोक्का गरिदिएको घटना बाहिरिएको हो ।

२०७५ सालमा बनाएको सो कपाली तमसुक मिटरब्याजमा मुद्दा परेपछि फर्जी ठहर भएको थियो । २०७५ सालमा अजय कुमार साह वैदेशिक रोजगारीमा रहेको बेला स्थानीय एक लिखनदाससँग उनले फर्जी कागज बनाउँदै उनको जग्गाजमिन रोक्का गरिदिएको हो ।

साह विदेशमै हुँदा उनीमाथि अदालतमा मुद्दा चलाएर उनको जग्गा जमिन रोक्का गराएको हो । यादवले बनाएको कपाली तमसुकको मिति २०७५ साल भएपनि सो समयमा साह वैदेशिक रोजगारीमा रहेकोले औठाँछाप वा हस्ताक्षर समेत फर्जी गरेको बताईएको छ ।

घर फर्केर आउँदा बहिनी बिहेको लागि जमिन बेच्न खोज्दा जग्गा रोक्का भएको सुनेपछि उनी चिन्तामा डुबे । एक अक्षर नपढेका साहले आफू हस्ताक्षर वा औठा छाप केही नगरेको बताउँछन् । अजयको नागरिकता नम्बर १८२०५०/८९८ भएपनि कपाली तमसुकमा १८२०५०/२७३ उल्लेख गरिएको छ ।

कपाली तमसुकमा उल्लेख गरिएको अजय साहको नागरिकता जारी मिति २०६७ साल ४ महिना २० गते उल्लेख गरिएको छ , जबकी अजयको अरिजनल नागरिकतामा नागरिकता जारी मिति २०७० साल १२ महिना १० गते उल्लेख छ । यस हिसाबले नागरिकता नम्बर, जारी मिति समेत मेल नखाएको अवस्थामा कागज फर्जी भएको पुष्टि हुन्छ ।

सोही विषयलाई लिएर मिटर व्याज सँघर्ष समितिले दुवै पक्षलाई बोलाएर सहमति गराएपनि नक्कली साहु रहेका यादवले फुकुवा गर्न मानेका छैनन् । मिटरव्याज सँघर्ष समितिका उपाध्यक्ष जलाल शेषले पीडित भनिएका अजय कुमार साहले रकम नै नलिएको र कपाली तमसुक समेत फर्जी भएको पुष्टि भएपछि एक रुपैयाँ तिर्नुनपर्ने सहमति भएको थियो । सोही कागजातमा जग्गा जमिन फुकुवा गर्ने भनेर सहमति गरेपनि यादवले फुकुवा नगरिदिँदा साहलाई समस्या भएको छ ।

गत भदौ २९ गते दुवै पक्षबीच जिल्ला प्रशासन कार्यालय महोत्तरी जलेश्वरमा सहमति भएपनि नक्कली साहु यादवले फुकुवा नगरेको गुनासो छ । अहिले अजय कुमार साह न्यायको लागि विभिन्न सँघ सँस्था, कानुनको ढोकामा भौँतारिदैछन् ।

यता, मिटरब्याज सँघर्ष समितिका उपाध्यक्ष शेखले समेत सहमति भएको र साहु भनिने विजय यादवले मनोमानी गरेको बताए । उनले विजयलाई जमिन फुकुवाको लागि पटक पटक भनेपछि उनी लुकेर भाग्ने गरेको बताए ।

अजय साहको १ विघा १ कठ्ठा ५ धुर जग्गा र १८ कठ्ठा खेत रोक्का गरिदिँदा उनी बिच्चलीमा परेका छन् । हामीले अजय यादवसँग नम्बरमा सम्पर्क गर्दा सम्पर्क भने हुन सकेनन् ।