जनकपुरः आँपको बगैँचामा युवतिको लास फेला, एसपीको टोली घटनास्थलमा

न्यूज ब्यूरो, जनकपुरधाम । मधेश प्रदेशको राजधानी क्षेत्रमा एक युवतिको शव फेला परेको छ । धनुषाको धनौजी गाउँपालिका वडा नं. ४ भडरियास्थित आँपको बगैँचामा युवतिको शव फेला परेको हो ।

बिहानै खेततर्फ गएका एक स्थानीयले युवतिलाई मृत अवस्थामा देखेपछि प्रहरीलाई खवर गरेको थियो । केही बेरमै घटनास्थल पुगेको भडरिया प्रहरी टोलीले जिल्ला प्रहरीको टोलीलाई खवर गरेको थियो ।

भडरियाको बिचला टोल भन्ने स्थानबाट करिब २०० मिटर उत्तरतर्फ आँपको बगैँचामा युवति मृत अवस्थामा फेला परेको हो । प्रत्यक्षदर्शीका अनुसार, कपडा पहिरनले महिला रहेको देखिएको छ । यद्यपी, महिला वा पुरुष हो भनेर अलमलता छ । प्रहरीले क्षेत्रलाई घेरा हालेपछि राम्ररी हेर्न नपाएको प्रत्यक्षदर्शीहरुले जनाएको छ ।

यता, धनुषाका प्रहरी प्रमुख एसपी दिनबन्धु शर्माको नेतृत्वमा अनुसन्धान टोली घटनास्थल पुगेका छन् । एसपीकै कमाण्डमा गएको टोलीले शव फेला परेको क्षेत्रलाई नियन्त्रणमा लिएर मुचुल्का गरिरहेको जनाईएइको छ ।

सो क्षेत्रबाट अहिलेसम्म कोही युवति वा युवक हराएको, सम्पर्कविहिन भएको घटना प्रहरीमा दर्ता नरहेको जनाईएको छ । मृतकको पहिचान अझै नभएको प्रहरीले जनाएको छ ।

शवको प्रकृति हेर्दा दुई तिन दिन अगाडी नै हत्या गरी फालिएको देखिएको छ । उमेर भने १७ देखि २० बर्षको बीचमा अनुमान गरिएको छ ।