कृष्णाको मूर्ति बिसर्जनमा मुसलमानहरुले फाले पत्थर र तातो पानी, अवस्था तनावग्रस्त

न्यूज ब्यूरो, सर्लाही । हिन्दु धर्मावलम्बीहरुले मनाउने कृष्णाष्टमी सम्पन्नपछि मूर्ति विसर्जन गर्न जाँदा मुस्लिम समुदायका व्यक्तिहरुले पत्थर (ढुँगा) र गरम पानी फालेपछि अवस्था बिग्रेको आरोप लगाईएको छ ।

सर्लाहीको मलँगवास्थित प्रत्येक बर्ष लाग्दै आएको कृष्णाष्टमी पूजा सम्पन्न भएपछि शुक्रबार मूर्ति विसर्जन गर्न जाने बेलामा बाटोमा पर्ने मस्जिदस्थित मुस्लिम समुदायका केही व्यक्तिहरुले ढुँगा र गरम पानी फालेपछि दुई पक्षबीच अवस्था तनावमय बनेको छ ।

मलङवाको नगरपालिका चौकमा शुक्रबार साँझदेखी मुर्ति विसर्जनमा भएको दुई समुदाय बिचको विवाद आज शबिनार पनि झन चर्किदै गएको छ ।

आज विहानैदेखि केही युवाहरुले नगरको विभिन्न चौकमा टायर बालेर प्रदर्शन गरेपछि बजार क्षेत्रका औषधि पसलहरु बाहेक सबै पसलहरु बन्द गरिएका छन् ।

सार्वजनिक सवारीसाधनहरु पनि छिटफुट रुपमा चलेका छन् ।ठाउँठाउँमा ठुलो संख्यामा सुरक्षाकर्मीहरु खटाइएका छन् । नारावाजी गर्ने केही युवाहरूलाई प्रहरीले नियन्त्रणमा समेत लिएको जिल्ला प्रहरी कार्यालय सर्लाहीले जनाएको छ ।

दुवै समुदायका केही युवाहरुले उग्रता प्रदर्शन गर्न थालेपछि प्रहरीले सुरक्षा कडा बनाएको छ । अवस्था तनावग्रस्त नै रहे आज साँझसम्म प्रशासनले मलँगवामा कर्फ्यू समेत लगाउन सक्ने अनुमान गरिएको छ ।

सर्लाही मलँगवाको वर्तमान अवस्था, तस्विरः पत्रकार विश्वनाथ ठाकुर

के भयो शुक्रबार ?
प्रत्येक बर्षझैँ मलँगवास्थित रहेको एक मस्जिदको रुट भएर कृष्णाको मूर्ति विसर्जन गर्न सयौँको सँख्यामा हिन्दु धर्मावलम्बीहरु सहभागी थिए । प्रशासनले नै तय गरेको रुट भएर मूर्ति विसर्जन गर्न जाँदै थियो । सोही रुटमा पर्ने मस्जिद नजिक गएपछि छतबाट केही व्यक्तिहरुले ढुँगाबाजीको साथै तातो पानी समेत फाल्न थालेपछि दुईतर्फी झडप भएको थियो ।