व्यापक विरोधको बीच विदेह नगरपालिकाले ल्यायो ७० करोड बढी बजेट

न्यूज ब्यूरो, जनकपुरधाम । धनुषाको विदेह नगरपालिकाले आगामी आर्थिक बर्षको लागि ७० करोड बढी बजेट ल्याएको छ । आईतबार नगरसभा मार्फत ७० करोड बढी बजेट ल्याएको हो ।

प्रतिपक्षिहरुको चर्को विरोधको बाबजुद नगरपालिकाले ७० करोड बढीको बजेट सार्वजनिकीकरण गरेको हो । लेखा अधिकृत विक्रम साहले नगर प्रमुख बेचन दासलाई बजेट बुक हस्तान्तरण गरेपछि सार्वजनकीकरण गरिएको हो । कुल बजेट ७० करोड ५ लाख ३५ हजार १ रुपैयाँ अनुमान गरिएको हो ।

आईतबार बिहान १० बजेदेखि नगरपालिकाको कम्पाउण्डभित्रै खुल्ला रुपमा गरिएको नगरसभाको क्रममा बजेट ल्याएको नगर प्रमुख दासले बताए । उनले केही दिन अगाडी विभिन्न राजनीतिक दलका नेता कार्यकर्ताहरुले खुल्ला रुपमा नगरसभा गर्नुपर्ने माग राखेपछि कोठा बाहिर नगरसभा गरिएको बताए ।

उनले चालु आर्थिक बर्षभन्दा अधिक बजेट ल्याएको बताए । नगरपालिकाका प्रमुख प्रशासकीय अधिकृत सँजीव कुमार साहको अध्यक्षता तथा नगर प्रमुख दासको प्रमुख आतिथ्यमा सम्पन्न ७ औँ नगरसभाबाट सो बजेट ल्याएको हो ।

नगरसभाको क्रममा नगर प्रमुख दासले नीति तथा कार्यक्रम प्रस्तुत गरेका थिए । नगरसभाको क्रममा विभिन्न वडाका वडाध्यक्ष, वडा सदस्य, कार्यपालिका सदस्य, कर्मचारीहरुको सहभागीतासहित विभिन्न दलका प्रतिनीधिहरुको समेत सहभागीता रहेको थियो ।