विदेह नगरपालिकाका मेयर दासले स्कूल र मुसहरवस्तीको लागि ल्याए करोडौँको बजेट

न्यूज ब्यूरो, जनकपुरधाम । अल्पसँख्यक समुदायबाट दोस्रो पटक मेयरमा निर्वाचित भएका धनुषाको विदेह नगरपालिकाका मेयर बेचन दासले अल्पसँख्यक वस्तीको लागि करोडौँको बजेट ल्याएका छन् ।

आर्थिक बर्ष २०८०/८१ को लागि केन्द्र सरकारबाट मेयर दासले १६ करोड बढीको बजेट ल्याउन सफल भएका छन् । मेयर दासको अथक प्रयासपछि केन्द्र सरकारबाट विद्यालय र मुसहर वस्तीको लागि बजेट ल्याएको हो ।

विदेह नगरपालिकाको तिनकोरियास्थित रहेको उच्च माध्यमिक विद्यालयको लागि ६ करोड ८३ लाख रुपैयाँ र विदेह नगरपालिका वडा नं. ९ स्थित एकिकृत मुसहर वस्ती निर्माणको लागि ९ करोड २३ लाख रुपैयाँ ल्याएका छन् । विद्यालयमा भवन निर्माणको लागि ६ करोड ८३ लाख रुपैयाँ आएको हो ।

स्थानीय सरकारको रोहबरमा भौतिक संरचना अब्बल बनाएको विद्यालयमा थप सुधारको लागि भवन निर्माण हेतु रकम ल्याएको बताए । आफू अल्पसँख्यक समुदायबाट दोस्रो पटक निर्वाचित भएको भन्दै अल्पसँख्यक समुदायलाई प्राथमिकतामा राखेर विकास निर्माण कार्य गरिरहेको बताए ।

उनले अल्पसँख्यक, सीमान्तकृत, दलित समुदायलाई राज्यको मूलधारमा ल्याउनको लागि सोही योजना तहत कार्यहरु गरिरहेको बताए ।