राती १० बजेसम्म जनकपुरको बजार खुल्ने भएपछि उफ्रिन थाले व्यापारीहरु

न्यूज ब्यूरो, जनकपुरधाम । रात्रिकालिन बजार खोल्नुपर्ने माग उठाएका जनकपुरका व्यापारीहरुले मात्र १० बजे रातीसम्म बजार खोल्ने अनुमति पाएपछि उफ्रिन थालेका छन् । जनकपुरधाममा आजदेखि रात्रिकालीन बजार सञ्चालन हुने भएको छ ।

जनकपुरधाम उद्योग वाणिज्य सङ्घले आज रातिदेखि जनकपुरधाममा रात्रिकालीन बजार सञ्चालनमा ल्याएको हो । रात्रिकालिन बजारमा रातैभरि बजार सँचालन गर्ने वा कम्तिमा पनि १२ बजेसम्म बजार सँचालन गर्नुको साटो राती १० बजेसम्म सँचालन गर्ने भएपछि व्यापारीहरुमा खुसीयाली छाएको छ ।

जनकपुरधाम उपमहानगरपालिकाले रात्रिकालीन बजार सञ्चालनका लागि अनुमति दिएको हो ।

नगरप्रमुख मनोजकुमार साहले तत्काललाई राति १० बजेसम्म बजार सञ्चालन गर्ने गरी अनुमति दिएको जानकारी दिए । उनले अहिले सुरु गरेपछि बिस्तारै बजार सुधार गर्दै जाने बताए ।

जनकपुरधाममा रात्रिकालीन बजार सञ्चालनका लागि जनकपुरधाम उद्योग वाणिज्य सङ्घले धेरै पहिलेदेखि विभिन्न निकायसँग माग गर्दै आएको थियो ।

उद्योगी व्यवसायीको माग बमोजिम रात्रिकालीन बजार सञ्चालन सम्बन्धमा आयोजना गरिएको अन्तर्क्रिया कार्यक्रममा नगरप्रमुख साहले आजदेखि रात्रिकालीन बजार सञ्चालनको प्रस्ताव गरेका थिए ।

जनकपुरधाम उद्योग वाणिज्य संघका अध्यक्ष जितेन्द्र महासेठले रात्रिकालीन बजार सञ्चालनले यस क्षेत्रको अन्य व्यवसायलाई पनि थप चलायमान बनाउने विश्वास व्यक्त गर्दै यसले धार्मिक पर्यटकहरूलाई थप आकर्षित गर्ने र यसले आर्थिक अवस्था चलायमान बन्ने विश्वास व्यक्त गरे ।