स्थानीय निकायमा कर्मचारी अभाव, सेवा र सेवाग्राही प्रभावित

न्यूज ब्यूरो |
जनकपुरधाम, ७ जेठ । कर्मचारी नहुँदा धनुषाका अधिकांश नगरपालिका र गाउँपालिकाले सेवाग्राहीलाई उचित सेवा दिन सकेका छैनन् ।

११ नगरपालिका, छ गाउँपालिका र १ उप–महानगरपालिका सहित १८ स्थानीय तह रहेको जिल्लाका अधिकांश कार्यालयमा कर्मचारी अभावका कारण दैनिक तथा प्रशासनिक काम समेत प्रभावित भइरहेको नगरपालिका र गाउँपालिकाका प्रमुखको भनाइ छ ।

जिल्लाको विकट शहिदनगर नगरपालिका मेयर उदय बरबरिया यादवले ९ वटा वडामा जम्मा ३ जना निमित्त वडा सचिवले काम गरिरहेको बताए । सबै वडामा वडा सचिव नभएका कारण दैनिक प्रशासनिक काममा प्रभाव परेको उनको भनाइ छ ।

‘नौ वटा वडामा तीन जना मात्रै निमित्त वडा सचिवले काम गरिरहनुभएको छ, जसका कारण जन्मदर्ता, बसाइँसराइ, विवाह दर्ता लगायत काम निकै प्रभावित भइरहेको छ’ नगरपालिकाका मेयर यादवले बताए ।

धनुषाकै अर्को विकट क्षेत्र कमला नगरपालिकामा नौ वटा वडामा चार सचिवले काम स्थानीय निकायमा कर्मचारी अभावका कारण सेवा प्रभावित गरिरहेका छन् ।

नगरपालिकामा जम्मा ६६ जनाको दरबन्दी भए पनि १८ जना मात्रै कर्मचारी रहेका छन, त्यो पनि नियमित आउँदैनन”, मेयर रामउदगार गोईतले भने – ‘एकातिर वडा कार्यालयमा सचिव नहुनु र अर्कोतिर नगरपालिकाको कार्यालयमा नै कर्मचारी पर्याप्त नहुँदा बजेट कार्यान्वयन गर्न समेत सकिरहेका छैनौंँ ।’

कमला नगरपालिकामा वडामा वडा सचिव पर्याप्त नहुँदा दैनिक प्रशासनिक काम नै प्रभावित भइरहेको नगरपालिकाका लेखा अधिकृत देव कुमार यादव बताउँछन । “नगरको ९ वटा वडामा ५ जना मात्रै वडा सचिव हुनुहुन्छ’ यावले भने, ‘कर्मचारी अभावका कारण वडा कार्यालय सञ्चालन गर्न समेत समस्या भइरहेको छ ।’

उनले थप्दै भने –‘स्थानीय निकाय कानूनी ऐन आए पनि पटक–पटक मन्त्रालयबाट ऐन संशोधनको परिपत्रहरु प्राप्त भईरहने भएका कारण कर्मचारीहरु गरिएको कामहरु कानून सम्वत नहुने त हैन भने भयका कारण समेत काम गर्न हिच्किचाउने गरेको छ ।’

नगरपालिका आसपासमा वडा कार्यालय यसरी कर्मचारी नहुँदा नगरपालिकाको वरिपरि नै भाडामा वडा कार्यालय सञ्चालन गरेर सेवा दिँदै आएका छन् ।

वडाअध्यक्षले कर्मचारी अभावका कारण आलोपालो काम गरेरै भए पनि सेवाग्राहीलाई सेवा दिनका लागि भाडामा नै कार्यालय लिएर कार्यालय सञ्चालन गर्दै आएको कमला नगरपालिकाका मेयर गोईतले बताए ।

स्थानीय तह कार्यान्वयनमा ल्याइएको करीब ६ महिना बितिसक्दा पनि कर्मचारी व्यवस्थापन हुन नसक्दा जिल्लाका अधिकांश नगरपालिका र गाउँपालिकाको वडामा दैनिक प्रशासनिक काम प्रभावित हुदै आएको छ ।

जिल्लामा सम्बन्धित निकायबाट पर्याप्त कर्मचारी नखटाइँदा प्रशासनिक कामदेखि लाभग्राहीले लिनुपर्ने सेवामा असर परेको सेवाग्राही रामलक्ष्मण कापडि बताउँछन् ।

स्थानीय तहका कार्यालयबाट कर्मचारी अभाव, स्थान अपुग र साधन स्रोतको कमीका कारण प्रभावकारी रुपमा सेवा दिन नसकिएको नगरपालिका र गाउँपालिकाका प्रमुखहरुले बताएको भनेर आजको न्यूजपेपर दैनिक पत्रिकामा समाचार प्राथमिकताका साथ छापिएको छ ।