जनकपुरमा माछा बिनाकै माछा महोत्सव, दारु खाएको बिहेको जन्तीझैँ नाचेर मदिराको प्रचार

न्यूज ब्यूरो, जनकपुरधाम । जनकपुरधामस्थित माछा बिनाकै माछा महोत्सव राखेर प्रायोजकलाई सन्तुष्ट पार्न मदिराजन्य वस्तुको प्रचार प्रसार गरेको पाइएको छ ।

नव मिथिला फाउण्डेशनद्वारा जनकपुरधामको रेल्वे स्टेशनमा आयोजना गरिएको माछा बिनाको माछा महोत्सवमा मात्र मदिराको प्रचार प्रसार गरेको पाइएको छ ।

प्रभु बैँक र एक बियर कम्पनी को प्रचार प्रसार गरी माछा बिनाकै माछा महोत्सव मनाएर प्रायोजकबाट रकम असुली गरिएको आरोप पनि लगाइएको छ ।

जनकपुरधाम रेल्वे स्टेशनमा एक स्टेज बनाएर माछा महोत्सव मनाइयो तर सो महोत्सवमा माछा त के चोईटा पनि देखिएनन् । माछाको एउटा नै स्टल नभएको महोत्सवलाई माछा महोत्सवको नाममा मदिराजन्य वस्तुको प्रचार प्रसार मात्र गरिएको देखिएको छ ।

केही विद्यार्थी टिकटोकर, कमेडियन, गायकहरुलाई बोलाएर १ घण्टाजति जन्ती जस्तै नाचगान गरेर माछा महोत्सव भन्दै प्रायोजकलाई समेत उल्लु बनाएको देखियो ।

प्रायोजक संस्थासंग मोटो रकम असुली गरेको स्रोतले जनाएको छ । तर माछा व्यापारी र कुनै पनि स्टलमा परामर्शदाताको उपस्थिति थिएनन् ।

माछा महोत्सव अवलोकन गर्न पुगेका सयौं सर्वसाधारणहरु रेल्वे स्टेशन परिसरमा आयोजना गरिएको सांस्कृतिक कार्यक्रममा विद्यार्थीहरुको नाचगान हेरेर फिर्ता भएका थिए ।

खल्लो र बिना दर्शककै बीच महोत्सवमा चर्चित नेपाली व्यंग्यकार आदर्श मिश्रा र जागेश ठाकुरको प्रस्तुतिसमेत राखिएको थियो । तर त्यहाँ पनि खासै उपस्थिति देखिएको थिएन् ।

आयोजकसंग सम्बन्धित केही व्यक्तिबाहेक ५० जना भन्दा बढी दर्शकसमेत पुग्न नसकेको देखिएको थियो । फितलो व्यवस्थापनको कारण व्यवसायीहरु माछा महोत्सवमा सहभागी नै भएनन् । स्थानीयवासीहरुले यस महोत्सवलाई बजेटको दुरुपयोग गर्ने मेसोको रुपमा लिएका छन् ।