खजुरी र महिनाथपुर क्षेत्र नाकामा पूर्ण कडाई, नामुद तस्करहरु साईजमा

न्यूज ब्यूरो, जनकपुरधाम । धनुषामा नयाँ एसपी र मधेश प्रदेश प्रहरीमा नयाँ डिआईजी आएपछि धनुषाको सीमानाकामा कडा कडाई गरिएको छ ।

ईलाका प्रहरी कार्यालय खजुरी क्षेत्र र बिओपी महिनाथपुर क्षेत्र लगायतको नाकाहरुमा अधिक कडाई भएपछि तस्करहरु साईजमा ल्याइएको छ ।

ईलाका प्रहरी कार्यालय खजुरी अन्तर्गत पर्ने ईनरबा, महुवा, खजुरी, दुहबी, ठाढी नाकामा सिभिल पोशाकको प्रहरी परिचालन गरी कडाई गरेपछि नामुद तस्करहरु साईजमा ल्याइएको छ ।

विवाहको नाममा कपडा, किरानाको समाग्रीहरु भारतबाट भन्सार छली गरेर ल्याउनेहरुलाई प्रहरीले कारवाही सुरु गरेको छ । विवाहको नक्कली कार्ड देखाएर भारतबाट अवैद्य समान ल्याउनेहरुलाई नाकासहित गाउँ क्षेत्रमा रोकेर समान जफ्त गर्न थालेको हो ।

आईतबार मात्र ईलाका प्रहरी कार्यालय खजुरीका ईन्सपेक्टर निरञ्जन घिमिरेको कमाण्डमा खटेको प्रहरीको टोलीले लाखौँको लत्ताकपडा, सरसमानहरु पक्राउ गरी भन्सार कार्यालय बुझाएको छ ।

सो ईलाका क्षेत्रमा सानादेखि ठुला तस्करी गर्दै आएका तस्करहरुलाई प्रहरीले उठीवास गराएको छ । यद्यपी, पुराना घुमुवा प्रहरीलाई जिल्ला तानिएपछि अपेक्षाकृत रुपमा तस्करीको समानहरु पक्राउ गर्न प्रहरीलाई कठिनाई भएको देखिएको छ ।

सो क्षेत्रसहित भारत बिहारको समेत छेउसम्म सुराक मिलाउने पुराना घुमुवाहरु तानिएपछि प्रहरीको कडाईपछि पनि तस्करहरुले कुनै न कुनै माध्यमबाट केही न केही समान भन्सार छली गरी ल्याउने गरेको देखिएको छ ।

ईलाका प्रहरीमा जनशक्ति कम भएको कारण पनि ससाना तस्करहरुले उछिन्नेको बताइएको छ । यस्तै, बिओपी महिनाथपुर क्षेत्रको नाकामा समेत कडाई गरेपछि अवैद्य रुपमा ल्याउने समानहरु धमाधम बरामद गर्न थालिएको छ ।