जनकपुरको काव्या हस्पिटलले पैसासँगै ज्यान पनि लुटे, मृतक परिवारलाई बाउन्सर बोलाएर कुटे

न्यूज ब्यूरो, जनकपुरधाम । धनुषाको जनकपुरधाम–२१ कुर्थाका अमित साह आफ्नी २६ वर्षीया पत्नी रिंकु साहको गर्भमा जुम्ल्याहा बच्चा रहेको जानकारी पाएसँगै सुरुदेखि नै सचेत थिए ।

रिंकुको सुत्केरीका बेला अपरेशन गरेर नै बच्चा निकाल्नुपर्छ भन्ने कुराको जानकारी पनि उनले चिकित्सकबाट पाइसकेका थिए । त्यसैले अमित सुरुदेखि नै सरकारी अस्पतालमा नगइ महिनैपिच्छे काव्या अस्पतालकी डा. सोनिया सिंहसँगै रिंकुको फलोअप जाँच गराउँदै आएका थिए ।

गत २५ मंसिरमा पनि रिंकुको स्वास्थ्यमा समस्या देखिँदा अमितले उनलाई सोनिया सिंहसँग परामर्शका लागि काव्या अस्पतालमा ल्याए । त्यसबेला डाक्टर सिंहले औषधि दिँदा रिंकुलाई सन्चो भएको थियो । अमित र रिंकु जुम्ल्याहा बच्चा पाउने भन्दै हर्षित थिए ।

आइतबार रिंकुलाई सुत्केरी बेथा लागेपछि उनलाई बिहान करिब १० बजे काव्या अस्पताल लगियो । उनलाई अपरेसन गर्नुपर्छ भन्ने कुराको पूर्वजानकारी अमितलाई थियो । सोहीअनुरूप डा. सोनियाले दिउँसो करिब १ बजे रिंकुलाई अपरेशन रुममा लगिन् । उनको अपरेसन सफल भइ करिब साढे १ बजे जुम्ल्याहा बच्चाको जन्म भयो ।

अपरेसनपछि डा। सिंहले पनि अब सबै ठीक रहेको कुरा अमितलाई सुनाइन् । त्यसपछि अमितको खुसी झन् दोब्बर भयो । उनी खुसी हुँदै अस्पतालकी स्विपरसमेतलाई पैसा बाँडे । उनका परिवारका अधिकांश सदस्य अस्पतालमै थिए । अमितको परिवारमा खुसीको सीमा थिएन ।

त्यतिकैमा उनीहरूको खुसीकै बीच एउटा दुःखद खबर आयो । अस्पतालले रिंकुलाई अपरेसनपछि अत्यधिक रक्तश्राव भइरहेकोले तुरुन्त रगतको व्यवस्था गर्न अमितलाई सुझायो । उनी पनि हतपत रगतको व्यवस्थामा जुटे । केहीबेरमै उनले चारपोका रगत अस्पताललाई उपलब्ध गराए । त्यतिबेलासम्म बिरामीसँग उनको परिवारका कुनै पनि सदस्यले भेटघाट गर्न पाएका थिएनन् ।

रगत उपलब्ध गराएको केहीबेरमै फेरि अमितलाई बोलाएर डा। सिंहले रिंकुको रक्तश्राव अझै नरोकिएकाले पाठेघर नै हटाउनुपर्ने सुझाव दिइन् । अमितले पनि अब दुईवटा बच्चा भइसकेकोले पाठेघर हटाउँदा केही फरक नपर्ने भन्दै पाठेघर हटाउने अनुमति दिए । डा। सोनियाले रिंकुको पाठेघर हटाएर उनलाई एनआइसियूमा सिफ्ट गरिन् । त्यसपछि अमितलाई बिरामीसँग भेट्ने अनुमति दिँदै उनी आफ्नो घर गइन् ।

अमितले रिंकुसँग भेट्न जाँदा उनलाई बिरामीको अवस्था खराब रहेको र उनी एनआइसियूमा रहेकोले भेट्न नपाउने भन्दै अस्पतालका कर्मचारीले प्रवेश नै गर्न दिएनन् । अमितको मनमा शंका उब्जियो ।

डाक्टरले विरामीसँग भेट्ने अनुमति दिए पनि अस्पतालका अन्य कर्मचारीले भेट्न नै नपाउने बताइरहँदा अमितले आफ्नो पत्नीको अवस्था कस्तो त्यो कुरा स्पष्ट थाहा पाउन अस्पताललाई दबाब दिए । त्यसको केहीबेरपछि अस्पतालका एक चिकित्सकले अमितलाई क्याबिनमा बोलाएर रिंकुको मृत्यु भइसकेको कुरा जानकारी गरायो ।

अमित छाँगाबाट खसेझैं भए । उनका एकछिनअघिका सबै खुसी दुःखमा परिणत भयो । अमिलाई चिकित्सकको कुरामाथि विश्वास नै लागेन । उनले अस्पतालको लापरबाहीले आफ्नो पत्नीको ज्यान गएको दाबी गरिरहे । डा. सिंहले अपरेसनकै बेला कुनै ठूलो गल्ती गरेर रिंकुलाई मारेको हुनसक्ने अमितको जिकिर छ । तर, उनको कुरा सुन्ने त्यहाँ कोही थिएनन् ।

रिंकुले डा। सिंहसँग नियमित गर्भ परीक्षण गर्दै आएकी थिइन् । चिकित्सककै सल्लाहबमोजिम आइतबार अस्पतालमा भर्ना भएको अमितले बताए । यसबीचमा पनि रिंकु चिकित्सक सिंहसँग नियमित सम्पर्कमा रहेको उनले बताए ।

मृतकका आफन्तले पनि अस्पताल भर्ना भएपछि बच्चालाई जन्मदिएको धेरै बेरपछि आमाको मृत्यु हुनुमा अस्पतालको गम्भीर लापरबाही भएको आरोप लगाएका छन् ।

रिंकु करिब आठ वर्षअघि डा. सिंहसँगै जनकपुरकै धनुषा अस्पतालमा कार्यरत थिइन् । यता, अस्पतालले महिलामा अचानक श्वासप्रश्वासमा समस्या देखिएको र अपरेसन गरेर बच्चा निकालेपछि उपचारकै क्रममा उनको मृत्यु भएको जनाएको छ । मृतकका आफन्तले अस्पतालमा केही बेर प्रदर्शनसमेत गरेका छन् । तर, अस्पतालले रामानन्द चोकका प्रकाश मिश्राको नेतृत्वमा १०–१५ जनालाई बोलाएर परिवारजनमाथि नै हातपात गर्न लगाएको पीडित पक्षको आरोप छ ।

प्रकाशले अस्पतालमा रिपोर्टिङका लागि पुगेका सञ्चारकर्मी अमरेश मल्लिकसहितकाको गुण्डागर्दी शैलीमा क्यामेरा बन्द गराउन लगाएर सबैलाई अस्पताल परिसरबाट बाहिर हटाएका थिए । मिश्राले सो क्रममा आफूसँग दुर्व्यवहारसमेत गरेको सञ्चारकर्मी मल्लिकले बताए ।