जनकपुरः कदमचोकको बीच सडकमै अटो, बस, रिक्सा पार्किँग, ट्राफिक चेकिँङग खेतमा

न्यूज ब्यूरो, जनकपुरधाम । मधेश प्रदेशको राजधानी जनकपुरधामको कदमचोकमा सवारी साधनको अव्यवस्थित पार्किँङगले आम सर्वसाधारणलाई सास्ती भोग्नुपरेको छ ।

कदचोक–हुलाकी सडकखण्डमा बीच चोकमै यात्रुवाहक बस, अटो रिक्सा, टेम्पो पार्किङग हुँदा सर्वसाधारणलाई आवतजावतमा सास्ती भोग्नुपरेको छ ।

सवारी साधनको हर्नको आवाजले आजित भएका स्थानीय व्यापारीहरुले समेत ट्राफिक प्रहरीलाई पटक–पटक बीच सडकबाट पार्किङग हटाउन अनुरोध गरिएपनि ट्राफिक प्रहरीले कुनै वास्ता नगरेको आरोप लगाइएको छ ।

चोकमा हुनुपर्ने ट्राफिक प्रहरी चेकजाँचको लागि खेतमा जाने गरेको देखिएको छ । जनकपुरभन्दा बाहिर खेतमा गएर ट्राफिक प्रहरीले चेकजाँच गरी असुली बढाएको आरोप व्यापारीहरुले लगाएका छन् ।

उनीहरुले जनकपुरधाम क्षेत्रभित्र ट्राफिक व्यवस्थापन अस्तव्यस्त भएपनि ट्राफिक प्रहरी सम्बन्धित ठाउँमा चेकजाँच नगरी खेतमा गएर बीच बाटो चेकिँग गर्ने गरेको आरोप लगाएका छन् ।

कदमचोक–कपिलेश्वर सडकखण्डमा पशु स्वास्थ्य केन्द्र तर्फ बीच बाटोमै दर्जनौ सवारी साधनहरु पार्किँग गरिदाँ आम सर्वसाधारणहरुलाई सास्ती भोग्नुपरेको छ ।

६५ फिटको सो सडकमा ४० फिटसम्म यात्रुवाहक बस, टेम्पो, अटो रिक्सा पार्किँग गरिने गरिएको छ । यद्यपी, सो ठाँउँमा नो पार्किँगको बोर्ड समेत लगाईएको छ ।

बजारबाट मोटरसाईकल, साईकल यात्रीलाई समेत सो सडकबाट आवतजावत गर्न कठिनाई भएको छ । बीच सडकमै गरिने गरेको घण्टौँसम्मको पार्किँङग समस्या उत्पन्न गरेको छ ।

फुटपाथमा स्थानीय व्यापारीहरुले पसलका समानहरु राखेर जाम गर्दा पैदलयात्रीलाई समेत समस्या उत्पन्न भएको छ ।