धनुषा प्रहरीको Dog टोलीले दिलिपलाई ईसारा गरेपछि खुल्यो कविता हत्याको पोल

न्यूज ब्यूरो, जनकपुरधाम । धनुषामा सोमबार साँझ भएको विभत्स हत्या प्रकरणमा आफ्नै भतिजो रहेको पुष्टि भएको छ ।

जिल्ला प्रहरी कार्यालय धनुषाले २४ घण्टा नबित्दै घटनामा सँलग्न भतिजोलाई पक्राउ गरेको छ । पर्याप्त सबुतको आधारमा आफ्नै जेठाजुको छोराले काकीको हत्या गरेको खुलेको छ ।

धनुषाको विदेह नगरपालिका वडा नं. ७ बेलापट्टि बस्ने स्थानीय श्रीराम साहकी श्रीमति कविता साहलाई उनकै जेठाजुको छोरा अन्दाजी बर्ष २० को दिपिल साहले हत्या गरेको खुलेको छ ।

बाँसको मुँग्रो प्रहार गरी रक्ताम्य अवस्थामा हत्या गरेको खुलेको छ । दिलिपको शरिर र केही कपडामा समेत रगत लागेको देखेपछि प्रहरीले उनलाई नियन्त्रणमा लिएको थियो ।

धनुषामा नयाँ हाजिर भएका एसपी विश्वराज खडकाले घटनाको २४ घण्टा नबित्दै मुख्य आरोपितलाई अदालतमा उभ्याएका छन् । उनले प्रहरीको डग टोलीको मदतले दिलिपसम्म पुग्न सफल भएको बताएका छन् ।

सम्बन्धित समाचारः

मृतक कविताको मोबाईल दिलिपले अन्डरपेन्टमा लुकाएर राखेको प्रहरीले थाहा पाएपछि झन शंका उत्पन्न भएको थियो । उनको शरिरको खानतलासी गर्दा उनको पछाडी रगत लागेको देखिएको थियो भने घर तलासी गर्दा उनको जिन्स र टिसर्टमा समेत रगत लागेको देखिएको थियो ।

कविताले बोक्ने मोबाईल दिलिपसँग फेला परेपछि दिलिप नै हत्यामा सँलग्न रहेको पर्याप्त प्रमाण जुटाएका छन् । दिलिपले मृतक कविताका १४ महिने छोरा कार्तिकलाई समेत निर्घात कुटपिट गरेको पाईएको छ ।

सुरुमा करेन्ट लागेर कार्तिक घाईते भएको बताएपनि उपचाररत कार्तिकलाई करेन्ट नभई निर्घात कुटपिट भएको पाईएको छ ।

पक्राउ परेका दिलिप साहलाई धनुषा जिल्ला आदालतवाट कर्तव्य ज्यान मुद्दा शिर्षकमा म्याद लिई थप अनुसन्धान कार्य भईरहेको धनुषाका प्रहरी उपरीक्षक एसपी खडकाले जानकारी दिए ।