मेयरको चर्को घमण्डले कमला नगरपालिका अझै बन्दी, मेयरमाथि नै शंका

न्यूज ब्यूरो, जनकपुरधाम । पूर्वी धनुषाको कमला नगरपालिकाका मेयर विशेश्वर प्रसाद यादवको घमण्डले नै पुनः कमला नगरपालिका बन्दको बन्दै भएको छ ।

आईतबार मेयर यादवको रोहबरमा प्रमुख प्रशासकीय अधिकृत सुबोध कुमार ठाकुरले हरहिसाब पारदर्शी गर्ने कार्यक्रम रहेको भएपनि मेयर यादव नआउँदा हरहिसाब पारदर्शी हुन सकेनन् ।

आईतबारसम्म खेस्रा गरी सम्पूर्ण हरहिसाब पारदर्शी गरी आगामी बुधबारदेखि नगरपालिका सँचालन गर्ने तयारी भएपनि मेयर यादवको घमण्डले नगरपालिका अझै बन्दको शिकार बन्नु परेको छ ।

मेयर पक्षका दुई वडाध्यक्षको अडानपछि सुरुदेखि नै बन्द रहेको कमला नगरपालिकाको उपमेयरले पूर्ण सहकार्य गर्न खोजेपनि मेयर यादवको चर्को घमण्डले नगरपालिका अपाँग भएको छ । मेयर यादव पक्षका वडाध्यक्षहरुमा वडा नं. ३ का वडाध्यक्ष राम भगत यादव र वडा नं. ८ का वडाध्यक्ष तृपित भुडेर रहेका छन् ।

धनुषा जिल्लामा बजेट नल्याउने दुई पालिकामध्ये कमला नगरपालिका पनि एक हो । नगराईन नगरपालिका र कमला नगरपालिकाले मात्र जिल्लाभरिमा सबभन्दा कमजोर रहेको छ ।

प्रमुख प्रशासकीय अधिकृत ठाकुरले समेत हरहिसाब दिने प्रतिवद्धता जाहेर गरेर उनले पनि हिसाब दिएनन् । अधिकृत ठाकुरले समेत अटेरी गर्दै मेयरको अनुपस्थितिमा हिसाब नदिने अडान राखेपछि भद्रगोल भएको हो ।

हरहिसाब हुने दिनमा मेयर नआउँदा मेयरमाथि सार्वजनिक शंका उब्जेको छ । मेयरले नगरपालिकालाई योजना तहत नै बन्दी बनाएर राख्न खोजेको आरोप छ ।

कमला नगरपालिकाको मेयर विशेश्वर प्रसाद यादवको राजीनामा समेत नागरिकहरुले माग्न थालेका छन् ।

नगरपालिका सँचालनको विकल्पः

नगरपालिकासँग ७ वटा वडाले योजना पेश गरिसकेको अवस्थामा रहेको छ । मात्र दुई वडाध्यक्षले योजना पेश नगर्दा अझै योजनाहरु अगाडी बढन सकेको छैनन् । यस्तो अवस्थामा मेयर, उपमेयरले स्थानीय तह सँचालन ऐन २०७४ बमोजिम बहुमतको आधारमा योजना सूचिकृत गरी कार्यक्रम अगाडी बढाउन सकिन्छ ।

यद्यपी, मेयर यादवले सबै वडाध्यक्षहरुलाई समेटेर सहमतिकै आधारमा कार्यक्रम अगाडी बढाउने मुडमा रहेका छन् ।