निर्वाचन सुरक्षाको लागि प्रहरी, सशस्त्र र गुप्तचरको यस्तो छ जिम्मेवारी

न्यूज ब्यूरो, जनकपुरधाम । सरकारले निर्वाचनको सुरक्षा व्यवस्था मजबुत बनाउन नेपाली सेनासहित ४ वटै सुरक्षा निकायलाई मैदानमा उतारेको छ । गृह मन्त्रालयले सवै सुरक्षा निकायलाई आ आफ्नो कार्यक्षेत्र छुट्याएर आवश्यक जिम्मेवारी दिएको छ ।

नेपाली सेना आवश्यकता अनुसार सरकारले तोके बमोजिम परिचालित हुनेछ । गृह मन्त्रालयले मतदाता, उमेदवार र प्रतिनिधिहरुको सुरक्षा गर्ने जिम्मेवारी नेपाल प्रहरी, सशस्त्र र जासुसी निकाय राष्ट्रिय अनुसन्धान विभागलाई दिएको छ।

मतदान स्थलको सुरक्षा नेपाल प्रहरी र गुप्चरले गर्ने छन् । गृह मन्त्रालयले बनाएको निर्वाचन केन्द्रित सुरक्षा योजना अनुसार नेपाल प्रहरीले मतदान केन्द्रको सुरक्षा गर्ने छ । मतपेटिका र निर्वाचन सामाग्रीको सुरक्षा नेपाल र सशस्त्र प्रहरीले गर्ने गृह मन्त्रालय स्रोतले बताएको छ।

मतगणना स्थल, निर्वाचन अधिकृत र अन्य कर्मचारीको सुरक्षा तीनवटै सुरक्षा निकायले गर्नेछ । जिल्ला तथा निर्वाचन क्षेत्रको सुरक्षाको जिम्मेवारी नेपाल र सशस्त्र प्रहरीले गर्नेछ । अतिविशिष्ट र विशिष्ट व्यक्तिहरुको सुरक्षाको व्यवस्था तीनवटै सुरक्षा निकायले गर्ने छन् भने जुलुस र सभामा समेत उनीहरुनै खटिने छन् ।

पर्यवेक्षक र अनुगमनका खटिएका व्यक्तिहरुलाई नेपाल प्रहरीले सुरक्षा दिनेछ । आगामी आइतबार हुने प्रतिनिधि र प्रदेशसभा निर्वाचननका लागि ७४ हजार ८ सय ४९ जना सैनिक अधिकारीहरु खटिने छन् ।

गृह मन्त्रालयका अनुसार मंसिर ४ को निर्वाचनमा ७१ हजार ६ सय ९३ जना प्रहरी, १ लाख १५ हजार म्यादी, ३५ हजार १ सय १६ सशस्त्र प्रहरी र १ हजार ९ सय २१ जना राष्ट्रिय अनुसन्धान विभागका सुरक्षाकर्मीहरु खटिएका छन् । निर्वाचनका लागि बनेको सुरक्षा योजना अनुसार उनीहरुलाई परिचालन गरिएको छ ।