मधेश प्रदेशः दिनदहाडै सहकारी कर्मचारीमाथि गोली प्रहार

न्यूज ब्यूरो, सर्लाही । मधेश प्रदेशको सर्लाही जिल्लास्थित दिनदहाडै एक सहकारी कर्मचारीमाथि गोली प्रहार गरिएको छ ।

सर्लाही जिल्लाको बागमती नगरपालिका वडा नम्बर १ मिलन चौकमा संचालित सगुन बचत तथा ऋण सहकारी संस्था लिमिटेडको सेवा केन्द्रमा हतियार देखाएर लुटपाटको प्रयास गरिएको हो ।

बुधबार बिहान १० बजेको समयमा भारतीय नम्बर प्लेटको मोटरसाइकलमा सवार भएर आएका तीन जनाको समूहले कार्यालय भित्रै पसेर नगद लुटपाट गर्न खोज्दा सेवा केन्द्रमा कार्यरत कर्मचारीले प्रतिकार गर्दा उहाँमाथि लुटेराले ४ वटा गोलि प्रहार गरेका छ ।

अज्ञात समूहको गोलि प्रहारबाट हरिवन नगरपालिकामा रहेको सगुन बचत तथा ऋण सहकारी संस्था अन्तर्गतको बागमती सेवा केन्द्रमा कार्यरत ३० बर्षिय साजन कार्की गम्भीर घाईते भएको प्रहरीले जनाएको हो ।

प्रतिकार गर्ने बितिकै लुटेरा समूहले आफूमाथि ४ गोली प्रहार गरेको घाईते कार्कीले बताए । गोली प्रहार गरेपछि ३ जना भारतीय नम्बर प्लेटको एउटै मोटरसाईकलमा चढेर दक्षिणतर्फ भागेका छन् । लुटेरा समूहले रकम लुटेर लगे कि लगेनन् भन्ने कुरा एकिन भईनसकेको सगुनका अध्यक्ष केशव ढकालले जानकारी दिए ।

तिघ्रा, कुम, ढाड र कोखामा गोली लागेका घाईते कार्कीको हरिवन स्थित सरस्वती अस्पतालमा प्राथमिक उपचार पश्चात् थप उपचारका लागि एम्बुलेन्स मार्फत काठमाडौं पठाईएको जिल्ला प्रहरी कार्यलय सर्लाहीका प्रवक्ता विजय कुमार यादवले जानकारी दिए ।

कार्यालय खुले लगत्तै कार्कीमाथि आक्रमण भएको थियो । लुटपाटमा संलग्न व्यक्तिले नगद पैसा लुटने उद्देश्यले गोली मारेको भएपनि कार्कीको साथमा रहेको पैसा पहिले नै कार्यालयमा राखिसकेकाले लुट्न नपाएको बताइएको छ ।

लुटपाटमा संलग्न व्यक्तिले कार्कीको साथमा रहेको कालो झोला बोकेर भागेका छन् । गोली प्रहार गर्नेहरूको खोजी कार्य तिब्र पारिएको जिल्ला प्रहरी कार्यलय सर्लाहीले जनाएको छ ।

हेलिकप्टर मगाईएपनि कुनै खाली नभएकाले एम्बुलेन्समै पठाईएको हो । लालबन्दी–२ जुटपानी निवासी कार्कीलाई ४ गोली लागेपनि शरिरको संवेदनशिल भागमा नपरेकाले धेरै खतरा नदेखिएको र उनी बोलिरहेको सरस्वती अस्पतालका सञ्चालक डा। राजिब साहले जानकारी दिए ।

राजमार्ग छेउमा नै दिनदहाडै सहकारी कर्मचारीमाथि लुटपाट गर्ने नियतले ४ वटा गोलि प्रहार भएपछि स्थानिय त्रसित भएका छन ।

गएको भदौ १० गते शुक्रवारका दिन बिहान १०ः१५ को समयमा गोडैता नगरपालिका वडा नम्बर ८ स्थित सिसौटिया रोडमा लालिगुराँस बहुउदेश्यीय कृषि सहकारी संस्थाले संचालन गरेको सिटी एक्सप्रेसबाट २ वटा मोटरसाईकलमा सावर भएर आाएका ४ जना अज्ञात व्यक्तिले हतियार देखाएर ल्यापटप, मोबाईल सहित ९ लाख ५० हजार बराबरको नगद लुटपाट गरेका थिए ।