मन्त्री पोखरेलले गरे बर्थिङ्ग सेन्टरको उद्घाटन

न्यूज ब्यूरो ||
जलेश्वर, ७ बैशाख । शिक्षा, विज्ञान तथा प्रविधिमन्त्री गिरिराजमणि पोखरेलले महोत्तरीको कान्तिबजारमा बर्थिङ्ग सेन्टरको उद्घाटन गरेका छन् ।

महोत्तरीको गौशाला नगरपालिकामा रहेको स्वास्थ्यचौकी कान्तिबजारमा शुक्रबार एक कार्यक्रमबीच उक्त बर्थिङ्ग सेन्टरको उद्घाटन गरेका हुन् ।

नगरपालिकाको वडा नं. १२ का वडाध्यक्ष कृष्ण बहादुर विश्वकर्माको अध्यक्षता एवम् मन्त्री पोखरेलको प्रमुख आतिथ्यमा सम्पन्न उक्त कार्यक्रमबीच बर्थिङग सेन्टरको उद्घाटन गरिएको स्वास्थ्यचौकी प्रमुख राम कुमार ठाकुरले जानकारी दिए ।

नगरपालिका भित्रै अर्को स्थानमा बर्थिङग सेन्टर भएपनि कान्तिबजारमा बर्थिङग सेन्टरको अभावमा गर्भवति महिलालाई सुत्केरीको लागि समस्या भइरहेको अवस्थामा स्थानीय स्तरमै बर्थिङग सेन्टर सँचालन भएपछि जनसमुदाय हर्षित भएको प्रमुख ठाकुरले बताए ।

बर्थिङग सेन्टरको अभावमा देखिएका समस्याहरुलाई मध्यनजर गर्दै स्वास्थ्यचौकी प्रमुख ठाकुरले स्थानीय तहका जनप्रतिनीधिहरुसँग निरन्तर सहकार्य गरी अति शिघ्र सँचालनको लागि आग्रह गरे अनुसार विधिवत रुपमा उद्घाटन गरिएको हो ।

यसका साथै, शिघ्र कुपोषित बालबालिकाहरुको लागि एकिकृत व्यवस्थापन (OTC) को समेत उद्घाटन गरिएको छ ।
यस ओटिसी सेन्टरमा स्थानीय स्तरका कुपोषित बालबालिकाहरुको लागि तयारी खाना उपलब्ध गराउने गरिन्छ ।

बच्चाको तौल र पाखुराको नाप अनुसार कुपोषित बालबालिकाहरुको लागि आरयूटिएफ वितरण गर्ने गरिन्छ ।

कार्यक्रममा प्रमुख आतिथ्यको आसनबाट बोल्दै मन्त्री पोखरेलले स्थानीय सरकारले यस बर्थिङग सेन्टरलाई उद्घाटनसम्म मात्र सीमित नराखी निरन्तरताको आवश्यकता औल्याए ।

महोत्तरी क्षेत्र नं. १ बाट प्रतिनीधि सभा सदस्य समेत रहेका मन्त्री पोखरेलले स्वास्थ्य, शिक्षा र प्रविधिको क्षेत्रलाई विकासको नमुना क्षेत्र बनाउने प्रतिबद्धता समेत जाहेर गरे ।

कार्यक्रममा नगरपालिकाका मेयर शिवनाथ महतो, उपमेयर आशा लामा, जिल्ला स्वास्थ्य कार्यालय प्रमुख राजीव झा, पोषण फाँट प्रमुख गीरेन्द्र झा, विभिन्न राजनीतिक पार्टीका प्रतीनीधि, युवा, महिला, भद्र भलादमी, जेष्ठ नागरिक, सुरक्षाकर्मी, अधिकारकमी, सँचारकर्मीहरुको सहभागीता रहेको थियो ।

यसका साथै, महिलाहरुको पाठेघर झरेको चेकजाँचको निःशूल्क शिविरको समेत आयोजना गरिएको थियो ।
उक्त शिविरमा २ सय बढी महिलाहरुले चेकजाँच गराएको थियो ।

कार्यक्रमलाई स्वास्थ्यचौकी एवम् वडा कार्यालयले आयोजना गरेको थियो भने जिल्ला स्वास्थय कार्यालय महोत्तरी, गौशाला नगरपालिकाको कार्यालय र सेभ द चिल्ड्रेनले सहयोग गरेको थियो ।