कोरियामा रहेका युवाहरुलाई मधेशमै लगानी गर्नुपर्छः मुख्यमन्त्री राउत

न्यूज ब्यूरो, जनकपुरधाम । मुख्यमन्त्री लालबाबु राउतले दक्षिण कोरियामा रहेका मधेशी युवाहरुलाई मधेशमा लगानी गर्न आग्रह गरेका छन् ।

मधेशी समाज दक्षिण कोरियाले शनिबार आयोजना गरेको दक्षिण कोरियाबाट तराईमा हुन सक्ने लगानी सम्भाव्यता सम्बन्धी अन्तरक्रिया कार्यक्रममा अनलाइन मार्फत प्रमुख अतिथिको आसनबाट बोल्दै मुख्यमन्त्री राउतले सो आग्रह गरेको हो ।

मधेशमा लगानी गर्न सकिने क्षेत्रहरुमा कृषि , पर्यटन , उद्योग र शिक्षाको क्षेत्र वृहत सम्भावना रहेको प्राथमिकतामा क्षेत्र रहेको उल्लेख गर्दै मुख्यमन्त्री राउतले लगानीको वातावरण निर्माणमा गर्ने जिम्मेवारी प्रदेश सरकारको रहेको बताए ।

उनले भने ,‘ आफनो माटो प्रति तपाईहरुले देखाउनु भएको सदभाव अनुकरणीय छ । मधेश सरकारको तर्फ बाट तपाईहरुलाई धन्यवाद दिन चाहन्छु । आउनु यहाँ लगानीको वातावरण हामी दिन्छौ । समृद्ध मधेश निर्माणको बाटोमा यहाहरुको सहयोगको अपेक्षा हामीले गरेका छौ ।”

प्रदेश सरकारले उद्योग ऐन मार्फत लगानीको वातावरण सुनिश्चित गरि सकेको उनको कथन थियो । कार्यक्रममा दक्षिण कोरियामा रहेको १ सय भन्दा बढी युवाहरुको सहभागिता रहेको थियो ।