जनकपुरको एक घरमा ६ घण्टादेखि छापामारी, लाखौँको अवैद्य मेडिकल उपकरण बरामद

न्यूज ब्यूरो, जनकपुरधाम । मधेश प्रदेशको राजधानी जनकपुरधामस्थित एक घरमा आज ६ घण्टादेखि निरन्तर प्रहरीले छापामारी जारी राखेको छ ।

जनकपुरधाम उपमहानगरपालिका वडा नम्बर ९ सँकटमोचन मन्दिरस्थित एक घरमा प्रहरीले दिउँसो १२ बजेदेखि नै सुरु गरेको छापामारी अझै सकेको छैनन् ।

सो घरमा भारतबाट अवैद्य रुपमा भित्र्याएको मेडिकल उपकरणहरु थन्काएर सप्लाई गर्दै आएको गोप्य सूचनाको आधारमा जारी राखेको छापामारीबाट लाखौँको अवैद्य उपकरणहरु बरामद भएको छ ।

भन्सार नतिरी भारतबाट अवैध रुपमा मेडिकल सामग्री ल्याएर राखिएको जनकपुरधामस्थित सो घरमा प्रहरीले ६ घण्टाभन्दा अधिकदेखि छापामारी जारी राखेको छ ।

जनकपुरधाम उपमहानगरपालिका वडा नम्बर ९ स्थित सो घरमा छापा मार्दा ठुलो मात्रामा मेडिकल सामग्री फेला परेको धनुषा प्रहरीका प्रवक्ता एवं डिएसपी जितेन्द्रकुमार बस्नेतले जानकारी दिए ।

मेडिकल सामग्री फेला परेपछि घरमा बसिरहेका तीन जनालाई पक्राउ गरिएको छ । पक्राउ पर्ने तीनै जना भारतीय नागरिक रहेको बस्नेतले बताए ।

ती सामानसहित तीनै जनालाई जिल्ला प्रहरी कार्यालय ल्याउने र अन्य अनुसन्धान गर्ने काम भइरहेको प्रहरीले जनाएको छ ।

सो घरमा बसेर भारतबाट लाखौँको मेडिकल उपकरणहरु भित्र्याएर जनकपुरधामसहित अन्य ठाउँमा सप्लाई गर्दै आएका थिए । उनीहरुले नेपाल सरकारको लाखौँ रुपैयाँ राजस्व छली गर्दै आएको गोप्य सूचनाको आधारमा धनुषा प्रहरीले छापामारी गरेको हो ।

जनकपुरमा यत्रो लामो छापामारी धनुषाका एसपी बसन्त रजौरेको ठुलो सफलताको रुपमा लिइएको छ । लाखौँको राजस्व चुहावट गर्ने तीनै जनालाई पक्राउ गरिएको हो ।

समाचार तयार पार्दासम्म धनुषा प्रहरीले अझै मुचुल्का उठाईरहेकोले के कतिको समान बरामद भएको बारे यकिन गरिएको छैनन् ।