कमला नदीले बगायो १ करोड रुपैयाँ, १२ महिनापछि पुनः निरिक्षणमै मातृका

न्यूज ब्यूरो, जनकपुरधाम । पूर्वमन्त्री एवम् नेपाल कम्यूनिष्ट पार्टी माओवादी केन्द्रका नेता मातृका प्रसाद यादवले गत बर्ष नै नीरिक्षण गरी गएका कमलाको बाँध पुनः भत्किन थालेको छ ।

गत बर्षको श्रावण ५ गते कमला तटबन्ध मर्मतको लागि ५० लाख रुपैयाँ दिलाउने वाचा गरेको नेता यादवले आज पुनः सोही ठाउँमा नीरिक्षण गरेका छन् ।

गत बर्ष नै धनुषाको सबैला नगरपालिका वडा नम्बर १३ किरतपुरस्थित कमला नदीले तटबन्ध कटानपछि बाँध नीरिक्षण गर्न पुगेका यादवले सोही ठाउँबाट ५० लाख पैयाँ दिलाउने पक्का गरेका थिए ।

धनुषाको निर्वाचन क्षेत्र नम्बर १ को प्रतिनीधि सभा सदस्य समेत रहेका नेता यादवल सोही ठाउँबाट उर्जा जलस्रोत तथा सिंचाई मन्त्री पम्फा भुसालसँग कुराकानी गर्दै बाँध मर्मतको लागि तत्काल रकम निकासा गर्न आग्रह गरेका थिए ।

नेता यादवका अनुसार मन्त्री भुसालले तटबन्ध मर्मतका लागि तत्काल ५० लाख निकासा गर्ने आश्वासन दिएकी थिईन। मन्त्री भुसालले तटबन्ध समस्याको दीर्घकालीन समाधानका निम्ति पहल गर्ने पनि प्रतिवद्धता जनाएकी थिईन तर, एक बर्षपछि पनि समस्या जौँ को त्यौँ रहेको छ ।

बाढी आएर क्षति पुरयाईसकेपछि कमला नदीको बाँध नीरिक्षणको लागि फोटो खिचाउन जानुपर्ने प्रचलनले कमला नदीको दीर्घकालिन उपाय हुन सकेको छैनन् ।

नेता यादवले नीरिक्षण गरेको तटबन्धमा कमला सिँचाई आयोजनाले एक करोड रुपैयाँको माटो पुरेको बताइएको छ । यद्यपी, त्यहाँ २ लाख बराबरको पनि माटो भने देखिएका छैनन् ।

कमला नदीमा ठुलो बजेट राखेर बजेट झ्वाम्म पार्ने दाउमा रहेका केही नेता, कमला सिँचाई आयोजनाका कर्मचारी, केही अन्य कर्मचारी, पहुँचबाला व्यक्तिहरुले कमला नदीमा समेत राजनीति थालेपछि समस्याको समाधान अझै हुन सकेको छैनन् ।

विहिबार सबैला नगरपालिकाका नव निर्वाचित मेयर कारीराम यादवसहितको टोलीले समेत तस्विर खिचाउन कमला नदीको तटबन्धमा पुगे । तर, गत बर्ष नै मातृका प्रसाद यादवले गरेको वाचा अझै पुरा भने गरेनन् ।