जनकपुरमा छुट्टीको दिन चलाएको १४ वटा सरकारी गाडी प्रहरीले समाते

न्यूज ब्यूरो, जनकपुरधाम । सरकारले पेट्रोल, डिजलको खपत कम गर्न सातामा दुई दिन सार्वजनिक विदा दिएपछि विदाको दिन चलाएको सरकारी गाडी प्रहरीले समातेको छ ।

मधेश प्रदेशको राजधानी जनकपुरधामस्थित सार्वजनिक विदा रहने शनिबार र आईतबार चलाएको सेतो नम्बर प्लेटको सरकारी गाडी निन्त्रणमा लिन सुरु गरिएको छ ।

जिल्ला ट्राफिक प्रहरी कार्यालयले जनकपुरधामसहित आसपासको क्षेत्रमा समेत छुट्टीको दिन चल्ने सरकारी सवारी साधनलाई नियन्त्रणमा लिने कार्य थालनी गरेको छ ।

पेट्रोलियम पदार्थको खपत न्यूनीकरण गर्ने उद्देश्यले सरकारले हाल शनिबार र आइतबार गरी हप्तामा दुई दिन विदा दिएको छ । तर कार्यालय विदा हुँदाको दिन पनि सरकारी सवारी साधन चलाएको पाइएपछि त्यसलाई नियन्त्रणमा लिएर ट्राफिक प्रहरीले थन्क्याउन थालेको छ ।

शनिबार र आइतबार गरी १४ वटा सरकारी सवारी साधन नियन्त्रणमा लिएको जिल्ला ट्राफिक प्रमुख प्रहरी निरीक्षक चन्द्रभूषण यादवले जानकारी दिए ।

उनका अनुसार नियन्त्रणमा लिइएका सवारी साधन कार्यालय खुल्ने दिन मात्रै दिइने बताए ।

‘हामीले नियन्त्रणमा लिएको ठाउँ आसपासमै ती सवारी साधनलाई होल्ड गरेर राखेका छौं’ उनले भने, ‘कार्यालय खुल्ने दिन मात्रै सम्बन्धित व्यक्तिलाई बोलाएर जिम्मा लगाउँछौं ।’

पेट्रालियम पदार्थको खपत न्यून होस भन्ने उदेश्यले सरकारले शनिबार र आईतबार सार्वजनिक विदा राखेको छ , तर विदाको दिनमा समेत सरकारी गाडी कुदाउँदा पेट्रोलियम पदार्थको झन अधिक प्रयोग बढ्न थालेको छ ।