ट्राफिक प्रहरी हबल्दार पाण्डेको बर्दिको धाक, त्रास देखाएर तमसुकमा औठाछाप

न्यूज ब्यूरो, जनकपुरधाम । एक ट्राफिक प्रहरी हबल्दारले एक सर्वसाधारणसँग बलपूर्वक ऋणको तमसुक बनाएको भन्दै उजुरी परेको छ ।

महानगरीय ट्राफिक प्रहरी प्रभाग फर्पिँगमा कार्यरत ट्राफिक प्रहरी हबल्दार सँतोष कुमार पाण्डे विरुद्ध प्रहरी हेडक्वाटरमा उजुरी परेको छ ।

उनीमाथि काठमान्डौँमै एक होटलको पछाडी लगेर बर्दिको धाक धम्की देखाउँदै जबरदस्ती तमसुक गराई औठाछाप लिएको भन्दै उजुरी गरेको हो ।

ट्राफिक प्रहरी हबल्दारले महोत्तरी जलेश्वरका राजेश कुमार रायलाई फोन गरी बोलाएर जबरदस्ती तमसुक गराएको भन्दै प्रहरी प्रधान कार्यालयमा उजुरी गरिएको हो ।

उजुरीकर्ता राय र ट्राफिक प्रहरी हबल्दार पाण्डेबीच व्यक्तिगत सम्बन्ध भएको तथा सोही क्रममा केही रकम लेनदेन भई कानुनी प्रक्रियासम्म गई रकम लिएको खुलाउँदै थप ५० हजार रुपैयाँ माग्दै जरबदस्ती तमसुक बनाएको निवेदनमा उल्लेख छ ।

तमसुक बनाउँदा सम्बन्धित वडामा दर्ता हुनुको साथै दुवै तर्फबाट कम्तीमा दुई जनाको सनाखत (सिफारिस) हुनुपर्नेमा सो नगरी आफ्नो मात्र र एक उनको तर्फबाट सनाखत गर्दै बलपूर्वक कागजात बनाएको आरोप लगाएका छन् ।

केही दिनअघि भएको लेनदेको मुद्दामा मिलापत्र भएपनि हबल्दार पाण्डेले पुनः थप ५० हजार रुपैयाँ माग्दै नदिएपछि जरबदस्ती कागजात बनाएको भन्दै उजुरी गरिएको हो ।

रायका अनुसार, प्रहरी हबल्दार पाण्डे ६ वटा सीमकार्ड सँचालन गरी मिटरब्याजीको धन्दा गरेको आरोप लगाए । उनले ५ वटा सीमकार्ड अझै उनकै नामबाट सँचालनमा रहेको आरोप लगाउँदै छानबिनको माग गरे ।

यता, ट्राफिक प्रहरी हबल्दार पाण्डेले आफूमाथि लगाएको आरोप निराधार रहेको बताए । उनले एक प्रहरी हबल्दारले मिटर ब्याजमा पैसा लगाउन कहाँबाट पैसा ल्याउने ? भनेर प्रश्न तेर्साउँदै आरोप खण्डन गरे ।