मधेशको दुई पालिकामा अख्तियारको छापामारी, सबै कागजातहरु नियन्त्रणमा

न्यूज ब्यूरो, जनकपुरधाम । मधेश प्रदेशको दुई वटा स्थानीय तहमा अख्तियार दुरुपयोग अनुसन्धान आयोगको टोलीले छापामारी गरेको छ ।

मधेश प्रदेशको सर्लाही जिल्लास्थित र पर्सा जिल्लास्थित गरी दुई ठाउँमा दुई वटा स्थानीय तहमा मँगलबार छापामारी गरी कागजातहरु नियन्त्रणमा लिएको जनाइएको छ ।

मधेश प्रदेशको सर्लाही जिल्लास्थित रहेको कौडेना गाउँपालिकामा अख्तियारको टोलीले छापामारी गरेको हो । मँगलबार दिउँसो करिब २ बजेको समयमा कागजातहरु नियन्त्रणमा लिएको जानकारी दिइएको छ ।

अख्तियार दुरुपयोग अनुसन्धान आयोगका प्रवक्ता श्याम प्रसाद भण्डारीको अनुसार कोरोनाको लागि सरकारले पठाएको राहत वितरणमा अनियमितता गरेको, कोरोना प्रभावितको लागि गएको रकममा अनियमितता गरेको, कर्मचारीहरुको तलबमा गडबडी गरेको सूचनापछि छापामारी गरिएको हो ।

अख्तियार दुरुपयोग अनुसन्धान आयोग बर्दिवासबाट खटेको अख्तियारको टोलीले सर्लाहीको कौडेना गाउँपालिकामा छापामारी गरी कोरोना सम्बन्धी सबै फाईलहरु नियन्त्रणमा लिएर फर्केको जनाईएको छ ।

सोही क्रममा मधेश प्रदेशकै पर्सास्थित जगरनाथपुर गाउँपालिकामा समेत अख्तियारको टोलीले छापामारी गरेको हो । मँगलबार दिउँसो नै सो गाउँपालिका पनि छापामारी गरेको हो ।

कोरोना प्रभावितलाई वितरणका लागि केन्द्र सरकारले पठाएको रकममा व्यापक अनियमितता भएको सम्बन्धमा अनुसन्धानको लागि अख्तियारको टोलीले गाउँपालिकाको कार्यालयमा छापा मारेर फाइल नियन्त्रणमा लिएको प्रवक्ता भण्डारीले जानकारी दिए ।

अख्तियारको टोली गाउँपालिकाको कार्यालयमै अहिले अनुसन्धानको लागि विभिन्न फाइलहरु संकलन गरी नियन्त्रणमा लिएको अख्तियार दुरुपयोग अनुसन्धान आयोगको टँगालका सूचना अधिकारी श्याम प्रसाद भण्डारीले जनाए ।

कोरोनाको बेला ८८ लाख रकमबाट प्रभावितहरुलाई राहत बाड्नु पर्ने भए पनि गाउँपालिकाले सो रकमबाट शिक्षकहरुलाई तलब खुवाएको र सोमध्ये २४ लाख रकम गाउँपालिकाका स्वास्थ संयोजक रामसिकिल साहलाई सापटी दिएको बताइएको छ। साहको कोरोनाकै कारण मृत्यु भइसकेको छ।

गाउँपालिकाका शिक्षकहरुलाई चौमासिक तलब खुवाइएको गाउँपालिकाका प्रमुख प्रशासकीय अधिकृत राज कुशवाहाले समेत स्वीकार गरेका छन्।