धनुषाका एक बालक सिरहाको गोलबजारबाट अपहरण, तीन घण्टापछि १०० रुपैयाँ लुटेपछि छाडे

न्यूज ब्यूरो, सिरहा । सिरहाको गोलबजारबाट विहिबार दिउँसै धनुषाका एक किशोरलाई अज्ञात समूहले अपहरण गरी छाडेर भागेका छन् ।

धनुषाबाट काम विशेषले गोलबजार पुगेका धनुषाको सबैला नगरपालिका वडा नम्बर ७ मखनाहा बस्ने १४ बर्षिय राम पण्डितलाई विहिबार दिउँसै गोलबजार चोकबाट अहपरण गरेको खुलेको छ ।

सँचारकर्मी समेत रहेका शम्भु पण्डितसँगै सिरहा पुगेका उनका भाईलाई अपहरणकारीहरुले अपहरण गरी तीन घण्टासम्म शरिर बन्धक बनाएर राखेको निवेदनमा उल्लेख छ ।

गोलबजार नगरपालिका वडा नम्बर ६ गोलबजारबाट तिन घण्टापछि प्रहरीको फोनबाट सम्पर्कमा आएपछि उनलाई अपहरणकारीहरुले छोडेर भागेको बताइएको छ ।

अपहरणमा परी अचानक सम्पर्कविहिन भएका राम पण्डितलाई उनका दाजु शम्भु पण्डितले धेरै बेरसम्म खोजबिन गरेपछि भेटाएनन् । फोन गरेपछि मात्र कागहरुको आवाज मात्र आएको र कोही नबोलेपछि उनी अपहरणमा परेको बुझिएको बताईएको छ ।

तुरुन्तै नजिकै रहेको ईलाका प्रहरी कार्यालय गोलबजारमा पुगेर उनका दाजुले प्रहरीलाई खवर गरेपछि प्रहरीले फोन गरेपछि अपहरणकारीहरु राम पण्डितलाई छाडेर भागेको बताईएको छ ।

सो क्रममा ईलाका प्रहरी कार्यालय गोलबजारका एक प्रहरीले उल्टै पीडित पक्षलाई धर्काउँदा घुमुवा प्रहरीको पनि सँलग्नता रहेको हुन सक्ने अनुमान गरिएको छ । सो सन्दर्भमा अनुसन्धानको लागि आग्रह गर्दा प्रहरीले भाई भेटेपछि यहाँबाट भाग्न भन्दै थर्काएका थिए ।

अनुसन्धान शाखाका सो प्रहरीको नाम नखुलेपनि उनको अहपरणकारीसँग सँलग्नता हुन सक्ने आरोप पीडित पक्षको छ । सोही प्रहरी चौकीमा सँचारमा कार्यरत एक प्रहरीले पण्डितलाई तुरुन्तै एक्सन लिएर मदत गरेको उनले सुनाए ।

सो क्रममा तीन घण्टासम्म शरिर बन्धकमा राखी राम पण्डितको मोबाईल समेत फुटाइदिएको छ भने साथमा रहेको १०० रुपैयाँ खोसेर प्रहरीको फोनपछि भागेको बयान उनले दिएका छन् ।