धार्मिक महायज्ञमा सरकारी ढुकुटी लुटाएर ओरकेष्ट्रा नाच, नेता प्रभु साह आफैँ बने अन्नाउन्सर

न्यूज ब्यूरो, जनकपुरधाम । मधेश प्रदेशको रौतहट जिल्लास्थित आयोजना गरिएको धार्मिक महायज्ञमा विहारबाट मगाएको ओरकेष्ट्रा नाचमा एमालेका नेता प्रभु साहले अन्नाउन्सरको भूमिका निर्वाह गरे ।

भारत बिहारबाट मगाईएको लौण्डालौण्डी तथा ओरकेष्ट्रा पार्टीको नाचमा प्रभु साहले अन्नाउन्सर (उदघोषक) बनेको देखियो ।

गत फागुन १७ गते रौतहटको मौलापुरमा आयोजना गरिएको मधानी महायज्ञ २०७८ को अवसरमा लाखौँ रुपैयाँ सरकारी ढुकुटी खर्च गरी बिहारबाट मगाएको ओरकेष्ट्रा नाच सहित स्थानीय ओरकेष्ट्राका नचनियाहरुको बीच पूर्वमन्त्री समेत रहेका नेता प्रभु साहले अन्नाउन्सर बन्दा उनको चौतर्फी आलोचना भएको छ ।

टिकटक सहित ओरकेष्ट्रामा नाच्ने एक नचनियाँको नाम नै लिएर दर्शकहरुलाई उनको नाच हेर्न आग्रह गरिएको भिडियोमा हेर्न सकिन्छ । बिहारी ओरकेष्ट्रा टिमको नाच समाप्त भएपछि टिकटकमा नाच्ने एक किशोरीको नाचको लागि नेता साहले आफैँ अन्नाउन्सर बनेका थिए ।

पूर्वमन्त्री भइसकेको पूर्व माओवादीका नेता प्रभु साहकी श्रीमति मौलापुर नगरपालिकाकी नगर प्रमुख हुन् । प्रत्येक बर्ष धार्मिक महायज्ञको नाममा यहाँको समाजमा अभद्र मानिने ओरकेष्ट्रा नाच ल्याएर नचाउने गरिन्छ ।

गत बर्ष गरिब किसानहरुको गहुँमा डोजर चलाएर सरकारी ढुकुटी लुटाएका नेता प्रभु साहले यसपाली विहार सहित टिकटकरहरुलाई ल्याएर सरकारी ढुकुटी लुटाएका छन् ।

हिन्दु धार्मिक महायज्ञमा धार्मिक कार्यक्रमहरु मात्र गर्नुपर्ने सुझाव जानकारहरुले दिएपनि नेता साहले व्यक्तिगत फाईदा र नजिकका मान्छेको व्यक्तिगत फाईदाको लागि सरकारी ढुकुटीले ओरकेष्ट्रा नचाउँदै आएका छन् ।

यहाँसम्म की उनले सो ओरकेष्ट्रा कार्यक्रमको आफ्नो अधिकारिक फेसबुक पेजमा प्रत्यक्ष प्रसारण समेत गरे । एक राजनेता यस्ता कार्यक्रमलाई बढाबा दिँदै अधिकारिक पेजमा प्रसारण गर्नुले पनि उनको चरित्रमाथि समेत प्रश्न तेर्साइएको छ ।