जनकपुरधामको मोनाष्टिक स्कुलले जित्यो इन्टरनेश्नल स्कूल अवार्ड

न्यूज ब्यूरो, जनकपुरधाम । मधेश प्रदेशको राजधानी जनकपुरधामस्थि रहेको चर्चित मोनाष्टिक आवासीय विद्यालयले ईन्टरनेश्नल स्कूल अवार्ड जित्न सफल भएको छ ।

मोनाष्टिक स्कूलले ब्रिटिस काउन्सिलद्वारा आयोजना गरिएको कनेक्टीँग क्लास रुपम प्रोजेक्टमा उत्कृष्ट गरेपछि इन्टरनेसल स्कुल अवार्ड हात पार्न सफल भएको हो ।

कनेक्टिङ क्लास रूम परियोजनाअन्तर्गत विगत एक दशकदेखि यो अवार्ड प्रदान गरिँदै आएको छ।

इन्टरनेश्नल स्कूल अवार्ड हात पारेपछि विद्यालयका प्रबन्धक निर्देशक डा. सोनु कुमार साहले विद्यालयका शिक्षक शिक्षिकाप्रति आभार प्रकट गरे । उनले विद्यालयको कर्मचारीको अटुट मिहिनेतपछि मोनाष्टिकले इन्टरनेश्नल अवार्ड जित्न सफल भएको बताए ।

उनले भने, “अवार्ड छनोटका लागि गर्नु पर्ने विभिन्न प्रोजेक्टमा सबै शिक्षक स्टाफले अटुट मेहेनत गर्नुभयो।, यो अवार्ड उहाँहरुको देन हो र अधिकार पनि उहाँहरुकै हो ।”

अन्तर्राष्ट्रिय स्तरको सिकाइ आत्मसात् गरी विद्यार्थी तथा शिक्षकलाई आधुनिक शिक्षण सिकाइ प्रक्रियामा सामेल गराई सीप विकासमा महत्त्वपूर्ण भूमिका खेलेको कारण विद्यालयले अवार्ड पाउन सफल भएको डा. साहले बताए ।

ब्रिटिस काउन्सिल, शिक्षा विभाग र पाठयक्रम विकास केन्द्रका प्रतिनिधिको समूहले अवार्डमा सहभागी स्कुलहरुले पेस गरेको अभिलेख, विवरणको मुल्याङ्कन गरी बालबालिकाको सिकाइ उपलब्धी अनुगमन गरी प्राप्त उपलब्धिका आधारमा अवार्ड प्रदान गरेको उनले थपे ।

विद्यार्थीले कति कुरा जाने र बुझे त्यो महत्त्वपूर्ण भएको कुरा रहेको उहाँले सुनाए । उनले थपे–“अबको ३ वर्ष पछि अवार्ड हात पार्नको लागि मात्र हैन कि हरेक वर्ष विद्यार्थीलाई गुणस्तरीय शिक्षा प्रदान गरेका छौँ, विद्यार्थीले के जाने र के सिके भन्ने अनुभूति गर्न सिक्नेछन् ।”

ब्रिटिस काउन्सिलले ग्लोबल सिटिजन मात्र नभई विश्वकै नागरिक बनाउन चाहेको बताउँदै उनले मोनाष्टिकले पाएको अवार्डमा सम्पूर्ण जनकपुरवासीको सहयोग देखाए ।

उनले भने, –“विद्यालयलाई मात्र हैन सम्पूर्ण जनकपुरधामबासीका लागि यो गर्वको कुरा हो। विद्यालयले गुणस्तरीय शिक्षाका लागि प्रतिस्पर्धा गरेर मात्र हुँदैन त्यसका लागि नयाँ–नयाँ प्रविधि प्रयोग गर्ने र विद्यार्थीलाई सहभागी पनि गराउनु पर्छ । परियोजनामा उल्लेख गरिएका अभिलेखहरु तयार पार्नु चानचुने कुरा होइन । यसका लागि लामो अभ्यास चाहिन्छ।हामी सो गरेर देखाउन सफल भएका छौँ।”

ब्रिटिस काउन्सिलबाट इन्टरनेश्नल अवार्ड पाउने जनकपुरबाट मोनाष्टिक स्कूल पहिलो विद्यालयको रुपमा परिचित भएको छ ।