आन्तरिक राजस्व कार्यालय जनकपुरका यी कर्मचारी जो पेट बाँधेर १४ घण्टासम्म गर्छन काम

न्यूज ब्यूरो, जनकपुरधाम । आन्तरिक राजस्व कार्यालयका एक कर्मचारी बिहानैदेखि अबेर रातीसम्म अहिले राजस्व सँकलन र कागज मिलानमा व्यस्त हुन्छन् ।

उनी हुन, आन्तरिक राजश्व कार्यालय जनकपुरको सँकलन शाखाका अजय प्रसाद साह रौनियार । बिहानै ७ बजे कार्यालय पुग्ने रौनियार राती अबेरसम्म कार्यालयमै काम गर्ने गर्छन् ।

पुस मसान्तमा सेवाग्राहीहरुको अधिक भीडलाई व्यवस्थापन गर्दै रौनियारले सेवाग्राहीको सुविधाकै लागि अबेर रातीसम्म काम गरी सरकारलाई सघाउने गरेको छ ।

उनी भन्छन् ,–“मेरो शाखामा मात्र पुस महिनामा सेवाग्राहीको भीड हुँदैन, यो बाह्रै महिना यस्तो भीड हुन्छ । आफू चप्पल समेत लगाएर नआउने सेवाग्राहीले सरकारलाई कर तिर्न आउँछन, उनीहरुलाई परेशानी र निरास गरेर पठाउन मन मान्दैन ।”

कार्यालयको समय बिहान १० बजेदेखि अपरान्ह ४ बजेसम्म भएपनि सेवाग्राहीको सुविधालाई ध्यानमा राखी उनी बिहान ७ बजेदेखि राती १० बजेसम्म पनि काम गर्ने गरेका छन्

आन्तरिक राजस्व कार्यालय जनकपुरका डाटा ईन्ट्री सुपरभाईजर (डा.ई.सु.) पदमा कार्यरत रौनियार सरकारले लिने लक्ष्य परिपूर्तिको लागि दिउँसोको खान समेत खान भ्याउँदैनन् ।

राती अबेरसम्म काम गरी कागजात मिलान गर्ने रौनियार बिहान कार्यालय समयमा कार्यालय प्रमुख आएपछि उनी फाईल लिएर दौडछन् । झ्यालमा दर्जन बढीको लाईनलाई समेत व्यवस्थापन गर्दै उनी आन्तरिक राजस्व कार्यालयले लिने लक्ष्य परिपूर्तिको लागि दिनरात खट्ने कर्मचारी हुन ।

सँस्था, कम्पनीहरुको बक्यौता, असुली, भौचर सँशोधन, सँकलन मिलानको जिम्मेवारी पाएका सुपरभाईजर रौनियारले कर तिर्ने सेवाग्राहीको लागि मात्रै अबेर रातीसम्म काम गर्ने गरेका छन् ।

डा. बाबुराम भट्टराई प्रधानमन्त्री हुँदा ओभर टाईम काम गर्ने कर्मचारीलाई शतप्रतिशत भत्ता उपलब्ध गराएको स्मरण गर्दै उनले अहिले तलबमा मात्रै अधिक ओभरटाईम गर्नुपरेको गुनासो पनि पोखे ।

उनले भने, –“दुर दराजबाट सेवाग्राहीहरु कर तिर्न आउँछन । कार्यालयको लक्ष्य प्राप्तीको लागि गर्नुपर्ने ओभरटाईमभन्दा पनि अधिक काम गरिरहेको छु । तर, कुनै अतिरिक्त सुविधा दिएको छैनन् । पुस मसान्तभित्रै मिलान गर्नुपर्ने सबै कार्य सँकलन शाखाकै जिम्मेवारी हुन्छ । यस्तोमा ओभरटाईमको लागि कुनै थप सुविधा भए झन मनोबल बढनेछ ।”

प्रचण्ड प्रधानमन्त्री हुँदा ५० प्रतिशत भत्ता उपलब्ध गराएको जनाउँदै उनले केपी ओली प्रधानमन्त्री हुँदा ३० प्रतिशतमा झारेको बताए । कोरोनाकाल आएपछि त्यो पनि हटाएको गुनासो उनले गरे ।

१४ घण्टासम्म निरन्तर काम गर्दा पनि कार्यालयले यसको लागि अतिरिक्त सुविधा दिनुपर्ने माग पनि उनले राखे ।

गत वि.सं. २०७५ सालमा आन्तरिक राजस्व कार्यालय आएका रौनियारले कार्यालयले निर्धारण गर्ने लक्ष्य प्राप्तीको लागि अहम भूमिका निर्वाह गर्ने गरेका छन् ।

हालमै विभिन्न स्थानीय तह सहित अन्य सरकारी सँस्थाहरुको देखिएको टिडिएस, भौचर सँशोधन, शिर्षक सँशोधनको चापले उनी अहिले थप ओभरटाईम गर्नुपरेको बताए ।

उनले भने, –“कार्यालयमा मेरो शाखामा आउने कुनै पनि सेवाग्राहीलाई हामीले निराश गरेका छैनौँ, अब पुसमै अधिक सेवाग्राहीको चापले झन थिचिएको महसुस हुन्छ । तर, सबै कागजात मिलानको लागि समय दिएर पनि मिलान गर्ने गरेको छु ।'