लोसपामा महन्थ ठाकुर विरुद्ध विद्रोह, जनकपुरिया नेताहरुले दिए पार्टी कार्यालयमा धर्ना

न्यूज ब्यूरो, जनकपुरधाम । लोकतान्त्रिक समाजवादी पार्टी (लोसप) मा आन्तरिक विद्रोह सुरु भएको छ ।

आईतबार जनकपुरका नेताहरुले काठमान्डौँस्थित पार्टी कार्यालयमा धर्ना दिएका छन् । पार्टीकै कार्यकताहरुले केन्द्रिय कार्यालय घेरेपछि लोकतान्त्रिक समाजवादी पार्टीको आन्तरिक विवाद छताछुल्ल भएको छ ।

पार्टीमा जिल्ला अध्यक्ष तथा प्रदेशमा पदाधिकारी नियुक्ती सम्वन्धमा पार्टी अध्यक्ष महन्थ ठाकुरले एकलौटी गर्दै आसेपासेलाई ग्राहता दिएको आरोप लगाउदै निर्णय सच्याउन माग गर्दै पार्टीका कार्याकताहरु काठमाण्डौ स्थित लोसपाको पार्टी कार्यालय घेराउ गरेका छन ।

लोकतान्त्रिक समाजवादी पार्टीका असन्तुष्ट पक्षले आइतवार पार्टीको केन्द्रिय कार्यालयमा पुगेर अध्यक्ष महन्थ ठाकुरसंग भेटन समय माग गरेका थिए तर अध्यक्ष ठाकुरले भेट गर्न नमानेपछि असन्तुष्ट कार्यकर्ताहरुले पार्टी कार्यालय घेराउ गरेका छन ।

महन्थ ठाकुरले लोसपामा एउटै व्यक्तिलाई ३/३ वटा पद दिएको भन्दै केही नेता कार्यकर्ताहरु असन्तुष्ट भएका छन् । उनीहरुले कार्यकारिणीको निर्णय बिना नै एकलौटी रुपमा नेतृत्व चयन गरेको प्रति दुःख व्यक्त गर्दै विद्रोह गरेका छन् ।

यता, असन्तुष्ट पक्षले पार्टीको विधानमा पार्टीका अध्यक्षलाई विना छलफलको नियुक्ती गर्नै अधिकार नभएकोले नियुक्ती रद्ध नगरे सम्म पार्टी कार्यालयको घेराउ देखि लिएर तालवन्दी सम्म जारी राख्ने चेतावनी लोसपाका युवा नेता मनोज कुमार साहले जानकारी दिए ।

उनले पार्टीभित्र एकलौटी तवरले बिना निर्णयको एउटै व्यक्तिलाई एक भन्दा अधिक पद दिएकोले आफूहरु विद्रोह गरेको बताएका छन् ।

“अहिले प्रदेश, जिल्लाहरुमा जुन नेतृत्वहरु, अध्यक्षहरु छानिएको छ, त्यो एकलौटी र अलोकतान्त्रिक छ । कुनै पदीय व्यक्ति लोकतान्त्रिक रुपमा छानिएको छ । एकल अध्यक्षीय प्रणाली हुनुपर्छ, एउटा व्यक्तिलाई एक पद मात्र दिनुपर्ने तर, तीन तीन वटा पद एउटै व्यक्तिलाई दिएको छ । यसको लागि हामी काठमान्डौँ आएका छौँ ।– नेता साहले भने ।