धनुषाधाममा प्रहरी र विद्यार्थीबीच झडप, अवस्था तनावग्रस्त

न्यूज ब्यूरो, जनकपुरधाम । प्रदेश नम्बर २ को धनुषा जिल्लास्थित एक विद्यालयका विद्यार्थी र प्रहरीबीच झडप भएको छ ।

धनुषाको धनुषाधाम नगरपालिका वडा नम्बर ३ धनुषास्थित रहेको धनुष जनता उच्च माध्यमिक विद्यालयका विद्यार्थीहरु र स्थानीय प्रहरीबीच केही बेर झडप भएको छ ।

विद्यालयमा नियमित पठनपाठन सहित विद्यालयको उचीत व्यवस्थापनको लागि विद्यार्थीहरुले पटक पटक ध्यानाकर्षण गराएपनि कुनै सुनुवाई नभएको भन्दै विद्यार्थीहरु तातेका हुन् ।

उनीहरुले विद्यालयको समयमा सयौँको सँख्यामा विद्यालय पुगेर विद्यालयको मुल द्धार तोडफोड गरेको छ । विद्यालय व्यवस्थापन समिति चयनको लागि समय तोक्न बारम्बार विभिन्न राजनीतिक दलले ताकेदा गर्दा पनि विद्यालयका प्रधानाध्यापकले कुनै सुनुवाई नगरेपछि विद्याथीहरु आन्दोलित भएका छन् ।

गत कार्तिक १२ गते नै अभिभावक भेलाबाट विद्यालय व्यवस्थापन समिति गठनको लागि मँसिर १० गते तय गरिएको थियो । विद्यालयबाट प्रधानाध्यापक राजेन्द्र साहले विभिन्न राजनीतिक दललाई पत्राचार गरी मँसिर १० गते विद्यालय व्यवस्थापन समितिको लागि बैठकको बारेमा जानकारी गराएको थियो ।

तर, एमालेको मँसिर १० गते अर्थात आज चितवनमा १० औँ राष्ट्रिय अधिवेशन हुने भएको भन्दै एमालले तत्काल स्थगित गरिदिन पत्राचार गरेको थियो । एमालेले विद्यालय व्यवस्थापन समिति गठन प्रक्रिया स्थगितको पत्राचार गरेको हो ।

सोही क्रममा विद्यालयमा व्यवस्थापन समिति नहुँदा देखिएको समस्यालाई मध्यनजर गर्दै धनुषाधाम नगरपालिकाले समेत विद्यालयमा उचीत व्यवस्थापन मिलाउन पत्राचार गरेको देखिएको छ । यद्यपी, विद्यालयका प्रधानाध्यापक राजेन्द्र साहले एकलौटी र वेवास्ता पारा देखाएपछि विद्यार्थीहरु बाध्य भएर आन्दोलित भएको बताईएको छ ।

दिउँसो १२ बजेदेखि विद्यालयका विद्यार्थीहरुले विद्यालय अगाडी प्रदर्शन गर्नुको साथै धनुषाधाम बजारभरि टायर बालेर प्रदर्शन गरेको छ । उनीहरुले उचीत ढँगले अध्ययन अध्ययापन हुनुपर्ने, सबै घण्टी पढाई हुनुपर्ने लगायतका माग राखी आन्दोलित भएका छन् ।

विद्यालयको मुख्य द्धारमा लगाएको फलामको गेटलाई विद्यार्थीहरुले तोडिदिएका छन् । सुरक्षामा खटेका ईलाका प्रहरी कार्यालय धनुषाधामका प्रहरी र विद्यार्थीबीच केही बेर तनाव उत्पन्न भएको थियो ।

अहिले अवस्था समान्य भएको प्रहरीले जनाएको छ । यता, विद्यार्थीहरुले आईतबारसम्म माग पुरा नभए पुनः यही हाल गर्ने चेतावनी पनि दिएको छ ।

विद्यार्थीहरुको आन्दोलनपछि आउँदो मँगलबार १४ गते विद्यालय व्यवस्थापन समिति गठनको प्रक्रिया अगाडी बढाउने सहमति भएको बताइएको छ ।