प्रदेश - २ को श्रम स्वीकृति अब जनकपुरमै, काठमान्डौँ जानु पर्दैन

न्यूज ब्यूरो ||
काठमाडौँ, ६ चैत्त । बैदशिक रोजगारीमा जानको लागि सरकारबाट गर्नुपर्ने श्रम स्वीकृतिको लागि अब काठमान्डौँ धान्नुपर्ने झन्झटबाट छुटकारा पाउने भएको छ ।

श्रम, रोजगार तथा सामाजिक सुरक्षा मन्त्रालयले वैदेशिक रोजगारमा जाने युवालाई सहज गराउन इटहरी, बर्दिबास र बुटवलबाट श्रम स्वीकृति प्रदान गर्ने निर्णय गरेको छ ।

प्रदेश नं. २ को लागि जनकपुर अञ्चलको महोत्तरी जिल्ला बर्दिवासमा श्रम कार्यालय राख्ने निर्णय आजको बैठकबाट गरिएको छ ।

‘जुन क्षेत्रबाट बढी कामदार विदेश गएका छन्। त्यही क्षेत्रमा श्रम स्वीकृति प्रदान गर्न कार्यालय स्थापना गर्नेछौं,’ मंगलबार आयोजित पत्रकार सम्मेलनमा श्रममन्त्री गोकर्णराज विष्टले भने, ‘पूर्वको इटहरी, दुई नम्बर प्रदेशको बर्दिबास र पश्चिमको बुटवलबाट श्रम स्वीकृति दिने निर्णय गरेको हो।’ भनेर कान्तिपुर दैनिक अनलाईनमा समाचार प्रकाशित भएको छ ।

उनले यसलाई तुरुन्त कार्यान्वयनमा लैजाने गृहकार्य सुरु भइसकेको बताए। ‘विद्यमान कानुनी व्यवस्थाअनुसार फरक नपर्ने गरी सेवा दिन प्रक्रिया मिलाइहाल्न निर्देशन दिइसकेको छु,’ उनले भने, ‘कुन कुन प्रकारको श्रम स्वीकृति दिन मिल्छ। त्यो दिइहाल्छौं।’

मन्त्रालयका अधिकारीहरुका अनुसार तत्काल श्रम स्वीकृति दिन मिल्नेछ। ‘बिदामा आएका कामदार श्रम स्वीकृतिको लागि काठमाडौं आउनुपरेन,’ विष्टले भने, ‘संस्थागत र व्यक्तिगत श्रम स्वीकृतिको विषयबारे तुरुन्तै टुंगाउनेछौं।’

पत्रकार सम्मेलनमा मन्त्री विष्टले वैदेशिक रोजगारलाई सहज, सरल र गुणस्तरीय सेवा प्रदान गर्नको लागि सबै खाले ‘सिन्डीकेट’लाई हटाउने बताए।

वैदेशिक रोजगार व्यवसायीहरुले स्वास्थ्य परीक्षणको नाममा ठूलो सिन्डीकेट रहेको बताउँदै आएका छन्।

उनले कामदारलाई न्यून सेवा शुल्कमा कामदार पठाइने विषयमा गहनरुपमा छलफल भइरहेको बताए।

‘कामदार न्युन सेवा शुल्क तिरेर वैदेशिक रोजगारीमा जाने वातावरण मिलाउन सरोकारवाला पक्षसँग छलफल गरी तुरुन्तै निर्णय लिइनेछ,’ उनले भने।

उनले सीपयुक्त जनशक्ति उत्पादन, सुरक्षित रोजगारको लागि आफूहरुले योजनाबद्ध रुपमा कामहरु अगाडि बढाउने बताए।