जनकपुरको जानकी मन्दिरमा चोरी, चोर सिसिटिभीमा कैद

न्यूज ब्यूरो, जनकपुरधाम । विश्व प्रसिद्ध जनकपुरको जानकी मन्दिरमा दिनदहाडै चोरी गरेपछि चोर सिसिटिभी क्यामेरा देखिएको छ ।

आईतबार जानकी मन्दिर घुम्न गएका बाहिरी पर्यटकको जुत्ता एक चोरले चोरी गरेर लगेको भिडियो सिसिटिभी क्यामेरामा कैद भएपछि पर्यटकले मन्दिरको व्यवस्थाप्रति नै प्रश्न उठाएका छन् ।

काठमान्डौँस्थित पशुपतिनाथ मन्दिरमा जुत्ता चप्पललाई सुरक्षीत साथ राख्नको लागि व्यवस्था मिलाइएको बताउँदै ती पर्यटकले जानकी मन्दिरको व्यवस्था नराम्रो रहेको दुःखेसो पोखे ।

तेस्रो मुलुकबाट जानकी मन्दिर घुम्न गएका एक विदेशी पर्यटकको जुत्ता एक युवकले चोरेर लगेको देखिएको छ । तर, यहाँ कुरा एक मात्र साधारण जुत्ताको नभएर मन्दिरको व्यवस्थाप्रति नै प्रश्न उठेको छ ।

विश्वप्रसिद्ध मानिने जानकी मन्दिर जस्तो प्राँगनमा केही बर्षअघि चप्पल, जुत्ता व्यवस्थापनको लागि स्टल राखिएपनि पुनः त्यो हटाउँदा श्रद्धालुहरुको जुत्ता, चप्पल चोरी भइरहेको देखिएको छ ।

पर्यटकले आफ्नो जुत्ता नदेखेपछि चोरी भएको आशँकामा जानकी मन्दिरमा लगाइएको सिसिटिभी फुटेजमा चोरी गर्ने युवकलाई देखिएको छ । मन्दिरमा ती युवक चप्पल लगाएर आउँछन, केही बेरमा ती पर्यटकको जुत्ता लगाएर त्यहाँबाट ठाटले हिँडेको देख्न सकिन्छ ।

पर्यटक घुमाउनलाई जानकी मन्दिर लगेका जनकपुरका धर्मेन्द्र शर्माले जानकी मन्दिरको व्यवस्थाप्रति आक्रोस पोखे । उनले यही रबैयाका कारण पनि जानकी मन्दिरप्रति पर्यटकको नाकारात्मक भावना उत्पन्न हुन सक्ने जीकिर गरे ।

पशुपतिनाथ मन्दिरमा मन्दिर प्रवेश गर्नुअघि चप्पल, जुत्ता राख्ने स्टल राखे उत्तम व्यवस्था गरी सुरक्षीत महसुस भएको बताउँदै उनले जानकी मन्दिरमा पनि सोही व्यवस्था पुनः सुचारु हुनुपर्ने माग राखे ।

जानकी मन्दिरबाट दिनहुँ कैयाँै चप्पल, जुत्ताहरु चोरी भईरहन्छन् तर कोही सिसिटिभी फुटेज भने चेक गर्न भ्याउँदैनन् । चप्पल जुत्ता चोर देखिएपनि उनी कहाँका हुन र को हुन भन्ने खोज्ने समय पर्यटकसँग नहुन पनि सक्छ ।

यसको लागि मन्दिर व्यवस्थापन समितिले यथाशिघ्र टोकन अनुसारको चप्पल, जुत्ता राख्ने व्यवस्थालाई पुनः सूचारु गर्नुपर्ने माग शर्माले गरे । उनले विदेशी पर्यटकको नाम भने उल्लेख गरेनन् ।