भ्रष्टाचारः मुख्यमन्त्री गद्दीले वितरण गरेको एउटा साईकलको मूल्य १२ हजारसम्म

न्यूज ब्यूरो, जलेश्वर । प्रदेश नम्बर २ का मुख्यमन्त्री मो. लालबाबु राउत गद्दीले “बेटी पढाउ, बेटी बचाउ” अभियान अन्तर्गत वितरण गरेको एउटा साईकलको मूल्य १२ हजारसम्म रुपैयाँमा खरिद गरिएको पाईएको छ ।

प्रदेश नम्बर २ को महोत्तरी जिल्लास्थित रहेको सोनमा गाउँपालिकाले छात्राहरुलाई वितरण गरेको साईकलको मूल्य रु. १२ हजार रुपैयाँसम्ममा खरिद गरेको महालेखा नियन्त्रक कार्यालयको प्रतिवेदनमा उल्लेख गरिएको पाईएको छ ।

गत विं.सं. २०७६ साल माघ १९ गते सोनमा गाउँपालिकास्थित रहेको सोनमा माध्यमिक विद्यालयमा वितरण गरिएको साईकलको मूल्य विभिन्न ठाउँबाट विभिन्न मूल्यमा किनेको पाईएको छ । १० हजारदेखि १२ हजारसम्म साईकल खरिद गरी कुनै हरहिसाब व्यवस्थापन नगरिएको महालेखा परीक्षकको प्रतिवेदनमा उल्लेख छ ।

सोनमा गाउँपालिकाले सोही बर्षमा एकपटक ९,५०० का दरले, १०,५०० का दरले गरी जम्मा १२६ वटा साईकल खरिद गरेको छ । ९५०० का दरले ९२ वटा र १०५०० का दरले ३४ वटा गरी कुल १२६ वटा साईकल कुल १३ लाख ७१ हजार ८२० रुपैयाँमा फरक फरक मूल्यमा खरिद गरिएको पाईएको छ ।

सोही मितिमा खरिद गरिएको ३४ वटा साईकल कुल ४ लाख ३ हजार ४१० मा खरिद गरिएको पाईएको छ । जस अनुसार एउटा साईकलको मूल्य ११ हजार ८६५ (करिब १२०००) रुपैयाँ देखाएको छ । एउटै बर्षमा विभिन्न समयमा खरिद गरिएको साईकलको मूल्य फरक फरक देखिन जाँदा अनियमितता भएको प्रष्ट देखिन्छन् ।

प्रदेश नम्बर २ को मुख्यमन्त्रीको बेटी बचाउ, बेटी पढाउ अभियान अन्तर्गत प्रदेशबाट वितरण गरिएको साईकलको मूल्य ८ सम्म खरिद र फरक फरक भएपछि अनियमितताको आशँका अख्तियार दुरुपयोग अनुसन्धान आयोगले मुख्यमन्त्री कार्यालयमा छापामारी गरी फाईलहरु समेत लगिएको छ ।

सोनमा गाउँपालिकामा सोही कार्यक्रम अन्तर्गत मुख्यमन्त्री कार्यालयभन्दा पनि ४ हजारसम्म बढीमा खरिद गरिएको पाईएको छ । सोही बर्षमा सोनमा गाउँपालिकाले २८७० रुपैयाँमा एउटा ब्याग किनेको छ । जसको लागी १२० वटा ब्यागको कुल ३ लाख ४४ हजार रुपैयाँ भुक्तानी गरिएको पाईएको छ ।

साईकल र ब्याग खरिदको लागि कुनै भर्पाई गरिएको छैनन् । साईकल वितरण गरिएको वा ब्याग वितरण गरिएको कुनै भर्पाई पेश नगरिएको महालेखाको प्रतिवेदनमा उल्लेख छ । भर्पाई नै नभएको खण्डमा छात्राहरुको साईकलको नाममा लाखौ रुपैयाँ अनियमितता रहेको देखिएको छ ।