सँजय साह 'टकला' को सजायलाई उच्च अदालतले उल्टयायो, जन्मकैदबाट मात्र ७ बर्षको सजाय

न्यूज ब्यूरो, जनकपुरधाम । जनकपुरको रामानन्दचोक बम विस्फोट घटनामा जन्मकैद सजाय सुनाइएका सँजय साह “टकला” को सजायलाई उच्च अदालत जनकपुरले उल्टयाएको छ ।

साढे ९ बर्षअघि जनकपुरको रामानन्द चोकमा भएको बम बिस्फोट घटनामा जन्मकैदको सजाय पाएका सञ्जय साहको सजायलाई उच्च अदालत जनकपुरले उल्ट्याउँदै जन्म कैदलाई घटाएर सात (७) वर्ष मात्र सजाय हुने फैसला गरिएको छ ।

उच्च अदालत जनकपुरका न्यायाधीशद्वय रमेश ढकाल र धीर बहादुर चन्दको संयुक्त इजलासले आज आइतवार अबेर राति उक्त फैसला गरेको एक कानून व्यवसायीलाई उदृत गर्दै पत्रकार अजय अनुरागीले लोकातन्तरमा समाचार ब्रेक गरेका छन् ।

गत आइतबारदेखि नै हेर्दाहेर्दैमा रहेको उक्त मुद्दाको फैसला राय किताबमा आज राति ८ बजे न्यायाधीशद्वयले लेखेको उदृत गरेका छन् । यद्यपी, अदालतको तर्फबाट यसको अधिकारिक पुष्टि आएको छैनन् ।

बम विस्फोटमा परेर ५ जनाको मृत्यु भएको थियो भने दर्जनौं घाइते भएको थियो। यसअघि उक्त मुद्दामा धनुषा जिल्ला अदालतले साहलाई जन्म कैदको सजाय सुनाएको थियो।

उनी हाल नख्खु स्थित कारागारमा छन्। ज्यान मार्ने उद्योगमा ७ वर्षको सजाय र कर्तव्य ज्यान मुद्दामा मुख्य कसूरवार नभएर षडयन्त्रकारीको रुपमा मात्रै सजाय निर्धारण गरिएको छ।

सँजय साहमाथि जनकपुरका सँचारउद्यमी अरुण सिँघानीया हत्या मुद्दामा जन्मकैद सुनाइएको छ । साहलाई बम विस्फोट मुद्दामा सजाय घटेपनि सिँघानीया हत्या प्रकरणको जन्मकैदको सजाय छँदैछ ।

जनकपुर बम विस्फोटको नालीबेली

तत्कालीन अवस्थामा प्रादेशिक संरचनामा मिथिला राज्य हुनुपर्छ भनेर घटना भएको क्षेत्रमा साहित्यकार, कलाकार, बुद्धिजीवी, विभिन्न संघ–संस्था, युवा क्लबहरू सम्मिलित मिथिला राज्य संघर्ष समिति आन्दोलित थियो ।

शान्तिपूर्ण तरिकाले आफ्नो माग राज्यसमक्ष पुर्‍याउन प्राध्यापक परमेश्वर कापडीको संयोजकत्वमा गठित उक्त संघर्ष समितिले एक–एक घण्टा चक्काजाम गरी सांस्कृतिक कार्यक्रमलगायत विभिन्न कार्यक्रमहरू गर्ने भनेर पहिलेदेखि नै तय गरेको थियो ।

१८ वैशाख २०६९ मा संघर्ष समितिले पूर्वनिर्धारित कार्यक्रमअनुसार जनकपुरको रामानन्द चोकमा सडकमा धर्ना दिएर विरोध प्रदर्शन गरिरहेको थियो ।

मधेसकेन्द्रित दलहरू सम्मिलित संयुक्त लोकतान्त्रिक मधेसी मोर्चाले समग्र मधेस एक स्वायत्त प्रदेशको अडान राखिरहेका बेला आफ्नो ऐतिहासिक पहिचान गुम्ने भन्दै मिथिला राज्य संघर्ष समितिले मिथिला राज्य माग गरिरहेका थिए । शान्तिपूर्वक धर्नामा बसेका बेला अचानक शक्तिशाली बम विस्फोट गराइयो ।

विस्फोटमा परी जनकपुर नगरपालिका– १० बस्ने झगरुलाल दास कथबनिया , जनकपुर ८ बस्ने बिमल शरण , महोत्तरी बथनाहा– ९ तथा हाल जनकपुर बस्ने रञ्जुदेवी झा , जनकपुर– ८ बस्ने सुरेश उपाध्याय र दीपेन्द्र दास गरी कुल पाँच जनाको ज्यान गएको थियो ।

विस्फोटनमा परेर ३२ जना घाइते भएका थिए । जनकपुरको इतिहासमा पहिलोपटक यसरी शान्तिपूर्ण आन्दोलनमा कुनै आपराधिक समूहले बम विस्फोट गराएको थियो । जानकी नवमीको उल्लास त्यो वर्ष चित्कारमा परिणत भएको थियो ।

२०७५ चैतमा पूर्व सांसद तथा राज्यमन्त्री समेत रहेका साहलाई घटनाको मुख्य योजनाकार भन्दै जन्मकैदको सजाय सुनाइएको थियो । जिल्ला अदालत धनुषाका न्यायाधीश राजेशकुमार कटुवालको इजलासले उनीसहित अरु ६ जनालाई पनि जन्मकैदको सजाय सुनाएको थियो ।

साह पहिलो संविधान सभा र दोश्रो संविधानसभा चुनावमा धनुषाबाटै विजयी भएका थिए । बम काण्ड घटना भएपछि उनी मुख्य योजनाकारको आरोपमा पक्राउ परेका थिए ।

दोस्रो सँविधान सभा चुनावमा नेपाली काँग्रेसका रामसरोज यादव (वर्तमान प्रदेश २ का भौतिक पूर्वाधार तथा यातायात मन्त्री) लाई पराजित गरेका थिए ।

---

पत्रकार अजय अनुरागीले लोकान्तरमा समाचार लेखेका छन् ।
समाचारको अरिजनल लिँकः सञ्जय साहको जन्मकैद सजाय उच्च अदालत जनकपुरले उल्ट्यायो