जनकपुरः टयुसन पढेर आउँदै गरेकी बालिकालाई तीन युवकले जिस्काए, न्याय नपाउँदा आत्महत्या

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधाम देखि केही दुरीमा रहेको पूर्वी धनुषामा एक बालिकाले आत्महत्या गरेकी छिन् ।

धनुषा जिल्लाको जनकनन्दनी गाउँपालिका वडा नम्बर ४ खजुरी टोल बस्ने १२ वर्षीया ममता कामतले बिष खाएर आत्महत्या गरेकी हुन् । स्थानीय केही युवकहरुले उनलाई जिस्काएपछि न्याय माग्न सरोकारबाला निकायलाई धाएपनि न्याय नपाउँदा आत्महत्या गरेकी हुन् ।

गत भदौ २३ गते ट्यूसन पढेर घर फर्किदै गर्दा सोही स्थान बस्ने १९ बर्षिय भिलबा दास, २० बर्षिय कलेश्वर दास र २२ बर्षिय सँजय दासले बालिकामाथि दुरव्यवहार गरेको थियो । तीन जनाले ममतालाई समातेर एउटा कागजको पर्चीमा आफ्नो मोबाइल नम्बर लेखेर दिएका थिए ।

ममतालाई दुरव्यवहार गर्दा उनले आफ्नो परिवारजनलाई बताएकी थिइन् । घटनाको जानकारी पाएलगत्तै उनका परिवारजनले नजिकै रहेको इलाका प्रहरी कार्यालय खजुरीमा उजुरी दर्ता गराउन पुगेको थियो ।

तर, बयान अपुग भएपछि प्रहरीले उजुरी दर्ता गर्न प्रहरीले मानेनन् । गत भदौ २४ गते पिडित परिवारले दिएको उजुरी प्रहरीले पीडित बालिकाको बयानपछि मात्र दर्ता गर्ने भनेपछि दर्ता हुन सकेनन् ।

प्रहरीले स्थानीय तहको न्यायिक समिति मार्फत घटना मिलाउन सल्लाह दिएको मृतक ममताको बुवा सुरेश कामतले बताए । त्यसपछि वडा नम्बर ४ का वडाध्यक्ष हरिशचन्द्र कामतलाई गुहार लगाएको बताइएको छ ।

वडा कार्यालयमा भदौ २५ गते छलफल भएपनि घटनाको निष्कर्ष नलाग्दै दुरव्यवहार गर्ने पक्षका रामउदगार दासले होहल्ला गरेपछि छलफल निष्कर्षमा पुग्न नसकेको वडाध्यक्ष कामतले बताए ।

न्यायमा ढिलाई भएपछि बालिकाले आत्महत्या गरेको स्थानिय धुपु कापरले बताए । गाउँकै केटाहरुले बालिकालाई जिस्काउने, दुव्र्यवहार गर्ने गरेकोबारे प्रहरी कार्यालयमा जानकारी गराउँदा समेत प्रहरीले कारवाही प्रक्रिया अगाडी नबढाउँदा बालिकाले आत्म हत्या गरेको बताए ।

प्रहरीले उजुरी दर्ता गरेर अपराधीलाई कानूनी दायरामा नल्याउँदा दुर्घटना भएको उनको भनाइ छ । अपराधीहरुलाई बचाउँन नेताहरु लागिपरेको उनको आरोप छ ।

मृतकक बालिका आफुले न्याय दिलाउन प्रहरी प्रशासन अग्रसर नभएको भन्दै आत्मग्लानी भई पिडा सहन नसकेर गहुँमा प्रयोग गरिने विषादी खाएर आत्महत्या गरेको मृतकका दाजु बलिराम कामतले बताए । कामतले बहिनीको न्यायको लागि आवाज उठाउँदा आफुमाथि समेत कुटपिट भएको बताए ।

ईलाका प्रहरी कार्यालय खजुरीका इन्सपेक्टर रवि मैनालीले पिडित परिवारले उजुरी दिदाँ पीडित बालिकालाई लिएर नआएपछि दर्ता प्रक्रियामा ढिलाई भएको बताए ।

पीडित परिवारका उजुरीको आधारमा आरोपित तीनै जनालाई प्रहरीचौकीमा बोलाएर घटनाबारे जानकारी लिएको बताए ।

घटना अनुसन्धानको क्रममा पीडित बालिकाको समेत वयान लिन बोलाएको तर नआउँदा आफुहरुले घटना दर्ता गर्न नसकेको बताए । प्रादेशिक अस्पताल जनकपुरमा शवको पोस्टमार्टम असोज १२ गते गरिएको छ ।

यसैविच, यस घटनाबारे इन्सेक प्रदेश २ संयोजक राजु पासवान, राष्ट्रिय मानवअधिकार आयोगका मानवअधिकृत मनमाया राणा मगरले पीडित परिवारलाई भेट गरि घटनाबारे जानकारी लिएको छ ।

घटनाबारे पीडित परिवारसंगै जिल्ला प्रहरी कार्यालय धनुषाका एसपी प्रकाश रानाभाटलाई भेटी घटनाको सुक्ष्म तरिकाले अध्ययन गरि दोषीलाई कारवाही गर्न माग गरेको छ ।

करिब २ बर्षअघि सोही ठाउँमा एक पुरुषले एक बालिकालाई आत्महत्या गर्न बाध्य बनाएको थियो ।