प्रदेश २ः वडाध्यक्षद्धारा महिलामाथि बलात्कार प्रयास, वडाध्यक्ष फरार

न्यूज ब्यूरो, सर्लाही । प्रदेश नम्बर २ को सर्लाही जिल्लास्थित एक वडाध्यक्षले एक महिलामाथि बलात्कारको प्रयास गरेको आरोप लगाइएको छ ।

सर्लाहीको ब्रम्हपुरी गाउँपालिका वडा नम्बर ७ नोकैल्वाकी एक ३० वर्षिया एक महिलामाथि बलात्कार प्रयास भएको आरोप लगाइएको छ । सोही वडाका वडाअध्यक्ष श्याम कुमार यादवले स्थानीय एक महिलालाई बलात्कारको प्रयास गरेका हुन्।

गत भदौ ५ गते राती करिब २ बजेको समयमा घरमा कोही पनि ब्यक्ति नरहेको मौका छोपेर घरभित्र प्रवेश गरि एक्लै सुतिरहेको अवस्थामा वडा अध्यक्ष यादवले आफुमाथि बलात्कार गर्न खोजेको पीडित महिलाको आरोप छ ।

वडाअध्यक्ष यादवको घर आफ्नो घरको छेउमै रहेकोले यसअघि पनि उनले पटक–पटक आफु माथि दुर्ववहार गरेको पिडित महिलाले गुनासो गरिन।

“त्यो दिन पनि वडाअध्यक्ष घरमा कोही नभएको मौका छोपेर घरभित्र प्रवेश गरि सुतिरहेको अवस्थामा जथाभावी रुपमा शरिरका विभिन्न सम्बेदनशिल अंगहरुमा हातपात गरि बलात्कारको प्रयास गरे”– उनले भनिन् ।

आफुलाई बचाउने प्रयास गर्दा नसकेपछि हल्ला गरेर छिमेकीलाई बोलाइ यादवको चंगुलबाट आफुलाई बचाएको उनले बताइन् । घटना लगत्तै फरार भएको वडाअध्यक्ष यादव घटनाको दिनदेखिनै सम्पर्क विहिन रहेको गाउँलेहरुले बताएका छन्।

आइतवार दिउँसो पिडित महिलासँगै सदरमुकाम मलंगवा आएका ब्रम्हपुरी गाउँपालिका–७ नौकैल्वाका स्थानीयबासी तथा पिडितका छिमेकीहरुले वडाअध्यक्ष यादव विरुद्ध जिल्ला प्रहरी कार्यालय मलंगवामा निवेदन समेत दर्ता गराइसकेका छन् ।

सोही निवेदनको आधारमा आरोपित वडाअध्यक्ष यादवलाई पक्राउ गर्न भनि दुई पटक प्रहरीहरु गाउँमा गइसकेको तर उनी गाउँमा नरहेकोले प्रहरीलाई खाली हात फर्कनु परेको स्थानीयले बताएका छन् ।

तर, उता वडाअध्यक्षका भाइ जस्विन्दर यादवको भने राजनीतिक निहुँ र गाउँमै भएको पुरानो झगडाको रिसिवीको बदला लिन गाउँकै केही व्यक्तिहरुले बलात्कारको नाउँमा फसाएर बदनाम गर्न खोजेको आरोप लगाएका छन् ।

पिडित महिलाका २ छोराछोरी छन् । आर्थिक अबस्था कमजोर भएका कारण उनका श्रीमान रोजगारीका लागि विगत दुईवर्षदेखि कुवेतमा छन् । पिडितले एक्लैले अरुको घरमा मजदुरी गरेर घर सम्हाल्दै आएकी छिन् ।