कार्यकक्षमै पियनसँग मालिस गराउँदै मेयर, चौतर्फी आलोचना

न्यूज ब्यूरो, जनकपुरधाम । प्रदेश नम्बर २ को धनुषा जिल्लास्थित एक स्थानीय तहका नगर प्रमुख (मेयर) आफ्नो कार्यकक्षभित्रै पियन (कार्यालय सहयोगी) सँग मालिस गराउँदै गरेको फोटो सार्वजनिक भएको छ ।

धनुषा जिल्लाको विदेह नगरपालिकाका मेयर बेचन दासले नगरपालिकाको कार्यालयमा काम गर्ने कार्यालय सहयोगी (पियन) सँग आफ्नो कार्यकक्षमै मालिस गराइरहेको तस्विर यतिबेला समाजिक सँजालमा हालिएपछि चौतर्फी आलोचना भएको छ ।

आफूलाई दलितको अगुवा समेत भनाउँदै मेयर बेचन दासले कार्यालय सहयोगीसँगको यो तस्विर समाजिक सँजालमा आएपछि चौतर्फी आलोचना भएको हो । उनलाई छोटे राजा भन्दै मेयरको कर्तुत समेत भनेर टिप्पणी गरिएको हो ।

मेयर दासलाई कार्यकक्षमै सोफामा बसेर मालिस गरिरहेको व्यक्ति सोही कार्यालयका पियन करन दास हुन् । भित्रबाट चुकुल लगाएर दाससँग दासले मालिस गराइरहेको अवस्थामा उनकै आसपासका एक जनाले सो तस्विर झ्यालबाट खिचेको बताइएको छ ।

यता, सो तस्विरलाई कसैले बदनाम गर्नको लागि खिचेको दाबी गर्दै आफू बेहोस भएपछि पियन दासले होसमा ल्याउन पानी छर्किरहेको दाबी गरेका छन् । मेयर दासका अनुसार, आफू कोभिड सँक्रमित भएर बेहोस भएपछि आफ्नै नातामा समेत पर्ने कार्यालय सहयोगी करन दासले होसमा ल्याउनको लागि पानी छर्कदै शरिर थिचिरहेको दाबी गरेका छन् ।

उनले सो तस्विर खिचेर कसैले चरित्र हत्या गर्न खोजेको पनि बताए । उनले समाजिक सँजालमा कपोकल्पित रुपमा तस्विर भाइरल गरिएको आरोप लगाए ।